El partíu asturianista plantega descentralizar les places, disminuir les ratios y garantizar la calidá del serviciu públicu
Aína ta acabante de facer les sos propuestes en rellación a la rede d’Escuelines que’l Gobiernu del Principáu d’Asturies va desendolcar. Dende la formación asturianista valoramos posivamente’l pasu dau, pero cuidamos que la calidá educativa va muncho más allá que l’apertura de escuelines y que ha siguise ufriendo places y descentralizando les escueles pa llegar a tola xeografía asturiana.
En cuantes a la calidá educativa, cabe recordar que la estaya de 0-3 años ye una etapa d’aprendizaxes d’habilidaes básiques pa la vida como la comunicación, l’alimentación, el desplazamientu, el control d’esfínteres… Amás, ye una fase onde los y les escolines son totalmente dependientes de la persona adulta y vulnerables. Debío al so “calter propiu”, defendemos la disminución de les ratios pa falar de calidá educativa. Nesti sen, plantegamos un averamientu más estrictu a les recomendaciones europees: 4 escolinos/es por educador/a na etapa 0-1; 6 na etapa 1-2 y 8 na de 2-3.
Tamién defendemos una mayor dotación de recursos personales a les escuelines cola figura de la persona de sofitu en cada aula y faceles inclusives con personal especializáu qu’atienda les necesidades individuales del alumnáu con diversidá funcional. Xunto a too esto, el partíu apostamos por ampliar los permisos de maternidá y paternidá p’abarcar el primer añu de vida y qu’éstos garanticen el cuidáu de la infancia cuando hai una enfermedá. Amás, pidimos que les escueles infantiles sigan el calendariu escolar afitáu pal restu d’etapes educatives, porque la reciella necesita descansar y el personal de les escuelines tamién, a la par que reclamamos una ufierta de campamentos y actividaes municipales pa los periodos non llectivos qu’ayuden a les families nesos momentos.
Esparder y descentralizar
Les Escuelines tienen que tar espardíes pela xeografía pa facilitar la conciliación de les families y pa fixar población en tol territoriu, amenorgando los desplazamientos na midida de lo posible. L’oxetivu habría ser que poblaciones con más de 500 habitantes tuvieren escuela pública de 0-3 años. Arriendes d’ello, cabe comentar que, concretamente, el suroccidente ta abandonáu al nun haber escueles en conceyos como Ibias, Allande, Pezós, Eliao, Samartín d’Ozcos y Taramundi y qu’hai otros como Cangas del Narcea o Tinéu nos que namás hai una plaza disponible por cada 3 neños/es.
Nel informe ellaboráu critícase tamién que na zona central, onde s’alcuentren los conceyos más poblaos, hai un déficit mui altu de places, sobre manera en Siero y Villaviciosa, que cuenten con una plaza per ca 5 neños/neñes. Uviéu, Xixón, Avilés, Llanera y L.lena son los otros conceyos onde la ratio de places ye mui inferior a la infancia que viven n’ellos.
Por último, dende Aína cuestionamos l’acumulación d’escueles nes mayores poblaciones y nes capitales de conceyu y proponemos la descentralización, teniendo en cuenta poblaciones grandes que tán ensin serviciu: Felechosa (Ayer), As Figueras (Castropol), Llastres (Colunga), Nueva (Llanes), Tiuya (Llangréu), Villoria (Llaviana), Returbiu (Mieres), Curniana (Salas), San Cloyo (Uviéu), La Fresneda, El Berrón y Carbayín (Siero), Salinas-Raíces (Castrillón), Blimea (SMRA), Uxo (Mieres), Cabanaquinta (Ayer), Veiga (Navia), L’Arena (Sotu’l Barcu), Los Barreros (Llaviana) y Cancienes (Corvera). La razón ye que les Escuelines apurren un serviciu básicu p’atrayer nueves xeneraciones y que’l rural precisa d’esfrutar de los mesmos servicios que los ciudaes.