Uviéu ye un conceyu con más de 220.000 habitantes al que s’alleguen miles tolos díes a trabayar. Sicasí, l’ociu y los espacios de cultura na ciudá nun tán al altor pa dar un serviciu mínimu a la so población nin permiten qu’Uviéu ufra oportunidaes atractives d’espardimientu y una industria cultural decente. Edificios abandonaos, marafundios nos que s’enterraron millones d’€ a coste públicu y que nun funcionen, solares, cases vacíes, nula posibilidá de desendolcar proyeutos culturales y d’ociu a los que sí acceden otros conceyos y pa toles edaes… A les denuncies de la sociedá, l’ayuntamientu siempre contesta cola mesma dinámica: POR CADA DENUNCIA VECINAL, FUMO CONSISTORIAL. Esti ye, güei, el diagnósticu d’Aína.
LOS PROBLEMES QUE DETECTAMOS
• Desaprovechamientu y deterioru de dellos espacios de la ciudá.
• Falta d’espacios pal ociu, l’espardimientu y l’autoorganización de la mocedá.
• Marafundiu de perres públiques en “proyeutos” que nun repercuten na mayor parte de la población.
• Nula iniciativa per parte de la corporación conceyil, que respuende a golpe d’idea feliz y namás énte la presión popular.
• Denuncia vecinal: fumo consistorial.
LOS ESPACIOS ENSIN USU Y ENSIN CALTENIMIENTU
1) “Palaciu los Neños”: tres les denuncies pola situación de desusu na que s’atopa – llegando a denunciase robos y mal estáu del edificiu – , la solución sigue ensin llegar. Trancáu.
2) Vieyu HUCA: les vecines lleven años sollertando sobre la situación, asemeyada a la del espaciu anterior pero con munchos metros cuadraos desaprovechaos y maltrataos nun barriu con munches necesidaes y proyeutos de futuru ensin abordar.
3) Palaciu los Deportes: tamién hai promeses de reforma inminente d’esti espaciu emblemáticu d’Uviéu mientres les vecines de Ventanielles piden sitios onde siguir organizándose col desagospiu del centru vecinal Los Ríos.
4) Plaza toros: depués d’años d’abandonu y dexadez política, dase un incumplimientu sistemáticu de los plazos fixaos pa los presuntos planes de tipu deportivu y pa la celebración d’espectáculos que se plantegaron ellí.
5) Fábrica de Gas: una de les ayalgues patrimoniales d’Uviéu, que depués de tar abandonada durante años ye agora oxetu de proyeutos espaculativos, siempre amenazada.
6) Terrenos del vieyu institutu de San Llázaro: la primer sede del esitosu festival Kuivi Pop Up –que se situó al añu siguiente nel espaciu del vieyu HUCA– yá nun va acoyer más proyeutos culturales o sociales, el conceyu d’Uviéu apuesta tamién pa ellos pol lladriyazu y la especulación con una megatorre.
7) La Malatería: otru edificiu na mesma zona que ta d’actualidá pola movilización de la xente de la zona escontra’l so proyeutu de de valtamientu. ¡Sedrá por necesidaes nos barrios!
8) Barrios de La Florida – Les Campes y La Corredoria: los dos barrios con más crecimientu y mayor concentración de xente mozo d’Uviéu (hai 7.800 habitantes en La Florida y 19.500 en La Corredoria), dambos con 0 espacios culturales.
9) Per último, la Fábrica de La Vega: la pieza que podía ser clave, que podía permitir da-y otru aire a Uviéu y ser motor cultural y d’historia, d’ociu y recintu ferial, d’investigación y de producción pa tol centru d’Asturies, amenazada pola piqueta, pola autopista y pola especulación urbanística que quier acabar col conxuntu, como denuncien les vecines.
POR CONTRA: LES GRANDES “INVERSIONES”
La banderona de La Escandalera: 47.060 € foi el coste inicial de la base, el mástil y la bandera, que ye necesario camudar cada 2X3. Too nuna de les places más visitaes y transitaes d’Uviéu y casi tocando con dellos edificios históricos y BIC.
“Espacio Buenavista – Calatrava”: años de males xestiones y sobrecostes millonarios pa terminar pasando a ser propiedá d’un fondu suizu, vacíu. Costó 360 millones d’€.
Centru Ecuestre “El Asturcón”: gastáronse 24 millones d’€ na construcción y más de 5 millones p’axeitalu; agora dióse una concesión a 25 años por 600.000 añales (más de 15 millones en total). Too ello pa un espaciu al qu’hai qu’acceder dende Uviéu al traviés de Llanera y qu’usaron 1.000 persones al añu nel so meyor momento.
Proyeutos del conceyu pa los barrios: 648.742 € pa facer una espla-NADA en La Florida, refugada por tol barriu y que nun tiene pinta d’entamar a funcionar como recintu atractivu pa nenguna actividá, y 2.200.000 € pa un mercáu que nunca abrió en La Corredoria.
Dende l’agrupación llocal d’Aína n’Uviéu tenémoslo claro: el nuesu conceyu necesita otru aire, precisa ser más vivible y que s’abra a nueves espresiones culturales y d’ociu interxeneracional, onde la mocedá pueda auto-realizase y onde lo público entame a xugar a favor de la calidá de vida de les persones que trabayamos, vivimos y producimos equí. Ser un conceyu qu’atraiga a xente pola so capacidá pa xenerar esperiencies granibles pa la población y una industria cultural venceyada. Non a la política del lladriyazu nin de la especulación, non a la megaturistificación y la hostelería que nos afuega. Por un Uviéu nel que pague la pena vivir.
Puedes atopar más información calcando nel siguiente enllaz: