Ye 25 de mayu y celebramos el día de la soberanía asturiana: facemos alcordanza de la nuestra historia y reivindicámosla pa garrar el futuru coles nuestres manes, pa facer una Asturies que pague la pena vivir.
Dexámosvos equí un artículu del nuesu compañeru Lluís Aique, que pertenez a la Mesa Nacional, y que fai delles reflexones sobre’l conceutu de soberanía y la so capacidá tresformadora, que reivindicamos nun día tan especial pal pueblu asturianu.
SOBERANÍES
La mayoría la xente, cuando oi falar de soberanía, quédase nesi conceptu que deprendió na escuela sobre la soberanía nacional y la indivisibilidá de la patria. Son conceptos que comparten la dictadura franquista y la Constitución del 78. Sicasí, tres la II Guerra Mundial diose en tol mundu un procesu de descolonización pol que les metrópolis europees tuvieron que renunciar a les sos posesiones coloniales, n’África y Asia sobre too. Delles veces el procesu foi traumáticu (la India independízase de Gran Bretaña) y otros foi dramáticu (la guerra colonial n’Arxelia). Pero nes décades de los 50, 60 y 70 del sieglu XIX la mayoría de les colonies europees consigue la independencia de la metrópoli amparándose nun conceptu: l’autodeterminación de los pueblos. En realidá, l’orixe d’esi conceptu remóntase hasta la Guerra d’Independencia de los Estaos Xuníos de Norteamérica. Washington, Jefferson, Franklin y demás padres de la patria nel país de les barres y les estrelles fueron a la cama siendo británicos y llevantáronse estaoxunidenses porque tolos pueblos del mundu tienen el derechu a desaniciar tou gobiernu que-yos seya nocivu. Eso foi a finales del sieglu XVIII, y pa principios del XIX toles colonies españoles n’América acoyéronse a esi principiu pa independizase tamién elles de la metrópoli. Unes décades más tarde apaez n’Europa’l Romanticismu col so producto, el nacionalismu, que dio orixe a la formación d’Italia y Alemaña, pero tamién a la decadencia del conceptu de los pueblos y el nacimientu de los estaos nación.
Nun hai nada nuevo embaxo’l sol. Quiciás anguaño lo que pase ye que los conceptos s’entemecen de munches maneres. Al nacionalismu de los estaos nación llámase-y patriotismu y al de los pueblos que viven dientro de los estaos nación llámase-y nacionalismu periféricu. L’autodeterminación de los pueblos, que nació como un conceptu universal de refugu a los gobiernos que son dañinos pa un pueblu determináu, pasó a llendase a los pueblos del pasáu colonial européu nel sieglu XIX, sobre too pol mieu a qu’esa “enfermedá” s’esparda a los pueblos europeos como pasó na última década del sieglu pasáu col desmembramientu de Yugoslavia o’l puxu independentista n’Escocia o Cataluña.
Pero la realidá ye bien diferente nesti sieglu XXI de la globalización y la era la información. N’Asturies tamos dientru d’un estáu, l’español, que pertenez a la Unión Europea. El mundu ye a caldía más interdependiente. Les decisiones qu’afecten a les nuestres vides puen tar tomándose nel despachu oval de la Casa Blanca, nel parllamentu européu en Bruseles, nel gabinete de ministros en Madrid o, cada vez más, na xunta d’accionistes d’una multinacional. Y ye verdá qu’internet pon tola información del mundu a la distancia d’un clic. Pero hai tanta información y tantos intereses detrás de cada noticia, testu de twit, semeya d’Instagram o videu de TikTok que les persones, a caldía más dependientes de la tecnoloxía y menos en contactu col mundu físicu real, yá nun saben qué ye real y qué inventao, tán aisllaes de los demás na so burbuya tecnolóxica personal y tán confundíes. La mayoría delega, nun tien opinión y dexa que les decisiones les tomen “otros que sí saben”. La mayoría piensa en cómo salvar del desastre intuyíu a la so propia persona individual; la idea de lo colectivo ta aboquiando.
El capitalismu como lu conocemos anguaño ye de calter financieru, favorez la especulación perriba la producción, y nun tien fronteres, nun ta asentáu en territoriu nengún. Por ello tien como ferramientes de trabayu el provocar grandes fames especulando col granu, por casu, si ello maximiza les ganancies, o dexar ensin trabayu a grandes sectores de la población llevando les fabriques a otros territorios, normalmente ensin lleis llaborales que protexan a la población de la esplotación. Eso lleva a que nos territorios onde sí esisten eses lleis llaborales que protexen a los trabayadores se quiten eses protecciones p’afalar la instalación d’empreses. A eso llámenlo aumentar la productividá. Amás, como necesita ampliar les sos árees de negociu pa siguir acumulando, el capitalismu invade les esferes de los servicios que garanticen los derechos de les persones pa convertiles en negociu. Por eso, a caldía presionen más pa privatizar sectores como la educación y la sanidá, non pa meyorar esos servicios sinón pa estrayer beneficios. Llegará un día que namás podrán acceder a la educación y los cuidaos médicos la minoría que tenga recursos económicos con qué pagalos, como se pue ver en sociedaes como la estaoxunidense. Y nun ye namás qu’esploten o dexen ensin derechos a les persones. Cola so necesidá de crecimiento infinitu nun mundu finitu, el capitalismu modernu ta acabando cola vida nel planeta al sobreesplotalu. Entá más, yá ta llegándonos la nueva revolución dixital de la intelixencia artificial, los chatbox y los mundos virtuales. Cola intelixencia artificial, van esapaecer cientos de millones de puestos de trabayu, dexando a la inmensa mayoría de la humanidá nuna situación de precariedá dependiendo, nel meyor de los casos, de subvenciones como l’ingresu mínimu vital. Nesi nuevu mundu, les persones quedarán col únicu papel dable de consumidores, d’entes col únicu fin de consumir los productos que los grandes capitales y les sos máquines decidan que tienen que consumir.
Ente too esto, n’Aína reivindicamos les soberaníes, en plural, como un principiu central col que posibilitar la realización personal y la vida digna de les persones, los colectivos y les sociedaes. Soberanía significa la capacidá de decidir. Aína reivindícala en plural porque ye necesario qu’abarque toles esferes de la vida humana: la producción y la reproducción, la enerxía, el trabayu, l’alimentación, el tresporte, la sanidá, los cuidados a los menores y los adultos mayores, la cultura y educación y, en fin, toa esfera onde se desenrrolle la vida humana. Pa ello ye necesario que les persones y les sociedaes nos faigamos activamente responsables de les nuestres vides y que’l poder políticu de decisión se reparta d’otra manera, hasta llegar a los grupos humanos y les persones que tienen que vivir con eses decisiones: hasta los barrios, los pueblos, les ciudaes, los conceyos y los territorios.