El partíu asturianista pon enriba la mesa una retafila midíes p’acabar colos problemes de tresporte nos conceyos que la conformen
Dende Aína espublicemos nes nuestres redes sociales un documentu gráficu onde reivindicamos la necesidá d’introducir delles reformes na xestión del tresporte público nel Nalón. Nin los autobuses nin los trenes furrulen como habríen facelo, provocando perxuicios continuos a les vecines y usuaries.
Poro, dende’l partíu defendemos dellos cambios nel sistema de tresporte, entamando cola llinia ente Riañu y Llaviana. Reivindícase la vuelta a les frecuencies anteriores al andanciu del Covid y l’abaratamientu del preciu del billete urbanu, ún de los más altos d’Asturies. Amás, vemos necesaria tamién la esistencia d’una mayor coordinación ente servicios pa que nun se produzan esperes ente autobús y autobús. Anguaño, la xente de Samartín y Llaviana tien d’esperar hasta quince minutos cuando se posa del autobús que vien d’Uviéu pa llegar al so pueblu, yá que la metá de les llinies procedentes de la capital d’Asturies nin siquier lleguen a L’Entregu.
Amás, los problemes apaecen tamién nes comunicaciones con otros llugares. La meyora de los servicios de tren y autobús con Xixón y Uviéu ye una reclamación xeneral ente les vecines y vecinos, apostando pol aumentu de les frecuencies o’l final de les obres del Soterramientu. P’acabar, agora que l’AVE ye un tótem pa dalgunos de los políticos asturianos, que’l Gobiernu d’Asturies s’atreviere a garrar les competencies ferroviaries diba ser daveres un pasu alantre y una declaración d’intenciones.