Aína caltién el compromisu y la solidaridá col pueblu palestín asistiendo a la manifestación d’esti sábadu 20 d’abril n’Uviéu
Esti sábadu viniente, día 20 d’abril, a les 12.30h, na Estación del Norte d’Uviéu, hai convocada una gran movilización internacional en solidaridá col pueblu palestín. Aína, como vien amosando dende la ofensiva militar de Netanyahu de va más de seis meses escontra un pueblu desarmáu al que se-y niega la esistencia política y física, fai un llamáu a la participación nel cortexu de la organización soberanista nesta movilización. Tenemos un deber políticu, moral y humanu pa con Palestina, pa pone-y fin a la ocupación y a esti xenocidiu del integrismu sionista que perpasa yá les 32.000 muertes.
Amás, p’allegavos, animámosvos a participar na iniciativa de Trenes Solidarios por Palestina, que van llegar a la capital del país dende Xixón, Avilés, Mieres y La Felguera enllenos de solidaridá y puxu.
Una vegada n’Uviéu, la xente d’Aína vamos atopanos delantre del monumentu “Asturias” que ta énte la puerta de la Estación a les 12.15h, con banderes d’Asturies, de Palestina y d’Aína:
ESTI ye’l sitiu esautu.
Recordámosvos los horarios de los trenes:
Trenes Solidarios por Palestina.
Xixón: 11:30 – 12:02. Salida Estación Renfe Sanz Crespo.
Avilés: 11:48 – 12:24. Salida Estación Renfe Avilés.
Llangréu: 10:46 – 11:22. Salida Estación Renfe La Felguera.
Mieres: 11:43 – 12:05. Salida Estación Mieres Puente.
Pa finar, dexamos equí’l comunicáu asoleyáu pol partíu nel mes d’ochobre, que sigue vixente dafechu, nel que demandamos a les instituciones asturianes, tamién, que muevan ficha pa parar la inxusticia.
Asturies col pueblu palestín. ¡Dende’l ríu hasta la mar, Palestina vencerá!