Les instituciones asturianes han facer tolo posible por poner fin al bañu de sangre, por que se cumplan les resoluciones de la ONU y pa sofitar la creación d’un estáu palestín.
Llevábemos munchos años ensin que l’axenda política se centrare na realidá de Palestina, la tierra de la eterna inxusticia. Asturies ye un país que siempre s’amosó solidariu cola so causa política, esistiendo equí bien de coleutivos que sofitaron el derechu del pueblu palestín a la so esistencia, a la conformación d’un estáu propiu, al cumplimientu de los marcos llegales mínimos arriendes de les resoluciones internacionales afitaes va munches décades y qu’enxamás se desendolcaron na realidá. Dempués d’un andanciu global, metanes de crisis humanitaries nel norte d’África, de la guerra a les puertes d’Europa, del éxodu de centenares de miles de persones refuxaes… torna a les primeres planes de los mass-media Palestina. Llega, otra vegada, en forma de traxedia, miles de muertes en mui poques hores y bombardeos, d’invasión per tierra, mar y aire y, en mediu, un pueblu que lleva viviendo la humildación mentanto les potencies occidentales miren pa otru llau. Estes potencies, de les que formamos parte alministrativamente al traviés del Reinu d’España, de la UE y la OTAN, toleren la ocupación, el tratamientu inhumanu de la xente y la perpetuación y cronificación d’un conflictu pal que namás tienen una solución final: el desaniciu de les y los palestinos de la so tierra. Pa ello, alienden la cultura del militarismu, del esencialismu y de la xenofobia, xenerando una inestabilidá política y social, amás, qu’afeuta a tolos pueblos del mundu.
La población palestina vive arrequexada en dos ghettos ensin comunicación ente sí nin haza’l mundu, con una economía embargada, ensin posibilidá pa la llibre circulación nin de persones nin de medios básicos, dependiendo de la voluntá d’un estáu fundamentalista p’absolutamente too, imposibilitada polos checkpoints físicos, económicos y políticos que carez dende la segunda meta del sieglu pasáu. Israel, que viola acaldía, toles resoluciones qu’obliguen a la creación d’un estáu propiu pa les y los palestinos, xestiona’l territoriu ocupando tierres y domicilios, establez condiciones non vivibles pa la población y, anguaño, desendolca una operación de destrucción total a gran escala na faza de Gaza y, tamién, en Cisxordania. Poles propies carauterístiques impuestes pol sionismu, la población nin pue salir, nin escapar de la muerte. La única lóxica qu’esperen de palestinos y palestines ye l’aguardar, en silenciu, la muerte. Y nello tamos, nuna dinámica de desesperación, rabia ya impotencia que namás xenera violencia como consecuencia d’una ocupación intolerable y la creación en Gaza del mayor campu de concentración del planeta.
Énte esti panorama, Aína ye consciente de que la solidaridá internacional ye la única manera de presionar a les instituciones pa que muevan ficha y faigan lo posible por acabar con esta situación. Poro, demandamos a les instituciones asturianes ya internacionales los siguientes posicionamientos mínimos:
1) Facer lo imposible por parar, agora mesmo, el bañu de sangre: les instituciones tienen el deber moral, énte tolos pueblos del mundu, de facer tolo posible por detener la perda de vides inocentes, de garantizar los derechos mínimos, los suministros d’alimentos, melicina, enerxía y agua, de permitir l’ayuda internacional humanitaria d’abrir víes de mediación y negociación xustes, asina como d’observación internacional. Cualquier cosa enantes que la guerra total d’un estáu con ún de los mayores exércitos del mundu escontra un pueblu atacáu sistemáticamente y ensin defenses.
2) Asistir equí: Asturies y los sos conceyos tienen capacidá p’acoyer persones refuxaes, como amosaron de recién, especialmente, con menores: el nuesu país tien de facer lo propio nesta ocasión, ufriéndose como espaciu seguru p’acoyer, nel casu de que fuere necesario, a la población qu’escapa del conflictu dando toles garantíes y garantizando los sos derechos. El nuevu gobiernu asturianu y los de los conceyos han apostar por abandonar la cultura del militarismu y el nacionalismu que tamos viendo estos díes cola normalización de los desfiles y xures de bandera civiles qu’a nengún progresu social respuenden y apostar pola cooperación en tolos ámbitos de la vida, la economía y la política.
3) Reclamar al estáu español y la UE el respetu y cumplimientu de la resolución 242 (1967) de la ONU que considera qu’han retirase les tropes militares d’Israel de tolos territorios ocupaos y el reconocimientu de la soberanía ya integridá territorial de tolos estaos de la zona, con derechu a vivir en paz nes sos fronteres, asina como l’acatamientu de toles decenes de resoluciones que, dende entós, asitien a Israel como estáu ocupante y conderguen el non cumplimientu de les mesmes pela so parte. Amás, desixir que se detenga la venta d’armamentu a un estáu colonu como ye Israel y facer presión económica torgando los alcuerdos comerciales pa que, coles perres de toes y toos nós, dexemos de financiar la guerra y el xenocidiu palestín.
4) Facer un llamáu a la movilización solidaria de la población pa que los derechos mínimos del pueblu palestín se consigan: que pare la guerra, que fine la ocupación, que s’estableza un estáu palestín democráticu y qu’esti sía dafechamente reconocíu y respetáu territorial, política y económicamente. Ye, precisamente, esmolecedor ver cómo dellos estaos europeos entamen a prohibir y reprimir movilizaciones populares en favor de los derechos de Palestina. Dibuxen un panorama peligrosu no tocante a los derechos democráticos, tamién, equí.
Esti, y non otru, ye l’únicu camín p’afitar unes condiciones mínimamente aceptables nuna rexón del planeta que yá vivió la inxusticia y l’apartheid demasiaes décades. La paz constrúise cola xusticia, non cola inxusticia.