L’agrupación llocal del Nalón plantega duplicar los servicios, modernizar la infraestructura, desdoblar la vía y suprimir pasos a nivel
L’agrupación llocal del Nalón d’Aína ta acabante d’espublizar un informe ellaboráu tres les continues quexes vecinales al rodiu les deficiencies na rede ferroviaria asturiana y los continuos accidentes na carretera AS-117, conocida popularmente como’l “Corredor del Nalón”. Nél plantéguense una serie d’actuaciones na llinia C2 de cercaníes (L’Entregu-Uviéu) y tratala col rangu d’infraestructura clave que tien qu’aspirar a convertise a mediu plazu nuna alternativa real pa la movilidá interurbana y, d’esti mou, desconxestionar tamién el tráficu rodáu nel Corredor del Nalón.
D’esta forma, dende’l partíu pídese realizar una apuesta decidida, con partíes económiques clares, que faigan de la rede ferroviaria pública la meyor opción pa la movilidá ente los conceyos del Nalón y les ciudaes asturianes, animando asina a la conversión de les conductores per carretera n’usuaries del trensporte públicu.
Del analís de l’agrupación sáquense una riestra d’aspeutos nos que se pide la urxente intervención. Ente les sos propuestes destaca la de duplicar el númberu de servicios y aspirar a tener una frecuencia horaria d’un tren cada 30 minutos. Tamién, reducir el tiempu de trayectu de los 40 a los 30 minutos, pa lo que se propón desdoblar y modernizar la vía, suprimir los pasos a nivel, sostituyir los trenes actuales y, amás, crear servicios express o semidireutos nes franxes horaries con mayor usu.
Finalmente, esiximos a les Alministraciones competentes y a les interesaes que pongan númberos a estes actuaciones y que vean na rede de ferrocarril una apuesta de futuru pa la movilidá interurbana que tien que ser una infraestructura clave na vertebración tanto del Nalón como d’Asturies. Amás, plantégase la necesidá de que’l Gobiernu d’Asturies asuma les competencies ferroviaries col envís de que la xestión de los trenes asturianos se faiga dende’l propiu territoriu.