Na Asamblea Nacional del próximu 25 de febreru, los y les afiliaes d’Aína tamos llamaes a afitar la composición que demientres los tres años vinientes, hasta la celebración del siguiente Congresu Nacional, habrán d’integrar dellos organismos fundamentales pal bon funcionamientu del nuesu partíu: la Executiva, la Mesa Nacional y la Comisión de Control y Garantíes Democrátiques.
Falamos de tres estamentos centrales pal desenvolvimientu de la organización:
- La Executiva ye l’órganu encargáu de dirixir el día a día del partíu y de representar el proyectu a nivel públicu.
- La Mesa Nacional tien l’encargu de controlar y asesorar l’aición de la Executiva, siendo la so función principal la de defender la aplicación de los alcuerdos algamaos nes Asamblees y Congresos Nacionales.
- La Comisión de Control y Garantíes Democrátiques ye l’órganu responsable de velar pol respetu de los drechos y la dignidá de les persones afiliaes a Aína, faciendo efeutivu’l cumplimientu de los estatutos del partíu per parte de les y los sos militantes.
La conformación d’estos órganos va llevase a cabu per aciu d’un procesu eleutivu nel que pueden participar toles persones afiliaes na Aína qu’asina lo deseen, mesmo como eleutores que como escoyibles. Cualesquier militante pue presentar la so candidatura a dalgún de los tres estamentos mentaos, alvirtiendo que la concurrencia a la eleición de la Comisión de Control y Garantíes Democrátiques ye incompatible coles otres dos restantes. D’otra banda, la presentaciones de candidatures a los tres organismos fadráse de mou individual, sacantes la Executiva, qu’almite candidatures coleutives d’hasta 13 integrantes.
Plazos y inscripción de candidatures
Les persones interesaes puen inscribir les sos candidatures al traviés de los formularios espresamente activaos pa ello, enantes del 15 de febreru. Les llistes de candidatos y candidates provisionales van ser asoleyaes el 16 de febreru de manera provisional y el 21 de febreru de manera definitiva. Les candidatures d’aquelles persones que nun formalicen la so afiliación a Aína enantes del 20 de febreru nun van poder concurrir a les eleiciones. Les votaciones van tener llugar el sábadu 25 de febreru na Asamblea Nacional, siguiendo un modelu d’escrutiniu mayoritariu plurinominal.