Una d’elles va tar dedicada a la combustión de residuos y la otra, a la creación d’una especialidá docente pa les llingües propies
Aína, nel so enfotu por facer de la política un llabor de participación en comuña, ta apostando pola creación de comisiones de trabayu en pequeños grupos abiertos a l’afiliación. Concretamente, estes selmanes tán formándose dos comisiones nueves nes que pue participar la Militancia.
Per un llau, la nuestra organización formó parte del Conceyu contra la Incineración, una plataforma formada por delles asociaciones ecoloxistes, vecinales y polítiques que tien como oxetivu final “evitar la combustión heteroxénea de residuos n’Asturies”. L’actividá del conceyu retomóse al conocese dos noticies:
En primer llugar, qu’en payares s’aprobó la quema de 90.000 tonelaes al añu na central de la Pereda (Mieres) y, n’otru sen, qu’en 2024 caduca y tien que redactase’l nuevu Plan de Residuos d’Asturies. Esti nuevu proyectu apuesta por una políticia d’incineración de residuos (nos tarrenos de Cogersa, por exemplu) énte la baxa tasa de reciclaxe esistente n’Asturies (namás qu’un 22%)
Ye un asuntu qu’afeuta a toa Asturies, pero especialmente críticu pa los conceyos de Mieres, Xixón, Llanera, Corvera y Carreño, onde yá se ta inicinerando en manes privaes y que son candidatos a agospiar la nueva central.
Poro, al traviés d’esti grupu de trabayu queremos dir definiendo la nuesa postura y les acciones necesaries pa presionar a la Xunta Xeneral y los ayuntamientos responsables.
Per otru llau, nel tarrén educativu, munchos son los altos cargos y organismos que nes últimes selmanes amosaron los sos posicionamientos al rodiu de la creación d’una especialidá docente pal profesoráu d’Asturianu y Gallego-asturiano. Unes de les más sonaes fueron les declaraciones de la ministra d’Educación Pilar Alegría refugando l’aprobación d’esta especialidá.
Pola mor d’estos acontecimientos, dende la Estaya d’Identidá y Desarrollu Cultural del partíu ta conformándose tamién una Comisión pa la Implantación de la Especialidá Docente d’Asturianu y Gallego-asturiano pa esponer el nuestru puntu de vista como partíu asturianista. En resultes, queremos apurrir un informe fonderu sobro la cuestión partiendo d’un analís en comuña que plantegue información y soluciones pa esti alderique.
Recordamos a toles persones que quieran formar parte d’estes comisiones que tienen a la so disposición el formulariu d’afiliación o inscripción al INICIU d’esta páxina. Cuntamos con toes pa sacar alantre esti trabayu xuntes.