Amás de la estinción de quemes y de l’asunción de responsabilidaes pa quien les provoca, defendemos la prevención y un mediu rural vivu y productivu.
La mayoría les quemes que se dan n’Asturies tienen los sos picos ente febreru y abril, y en setiembre. El 80% d’estos danse pol factor humano; esto ye, a costafecha. Y, entá asina, los medios de los que disponemos nun son abondos. La mayoría les persones que trabayen na prevención y estinción de quemes faenlo de manera precaria, con hores extra que superen les afitaes por llei y, en dellos casos, de forma voluntarista, ensin les midíes de protección llaboral afayaíces.
Agora mesmo tenemos más de 100 quemes actives, el clima nun favorez la so estinción; pueblos enteros tuvieron que ser desallugaos y nun se tienen los medios humanos y materiales p’amatalos toos, polo que tienen que concentrase naquellos que son más peligrosos. Esto significa que nun se controlen los focos más pequeños que puen dir a más nunes hores. Ési ye’l panorama.
Abúltamos que lo más importante ye la prevención que pasa, tamién, pol caltenimientu y la fixación de población nel mediu rural: ensin un futuru productivu nun va quedar naide na redolada. Ensin población nin actividá, les quemes van seguir siendo la norma nun territoriu que queda ensin nengún tipu de control comunitariu o institucional. Hai qu’aprovechar les característiques naturales d’Asturies, recuperar la xestión del mediu pa la xente que vive nos pueblos y sofitalo too ello dende lo público con formes nueves de producción que seyan coherentes col mediu y ayuden a la prevención de les quemes.
Tamién creyemos perimportantes una pedagoxía y una educación basaes na xestión del territoriu, entendida esta como una necesidá social qu’implica una participación ciudadana consecuente. Quemen lo que quemó va poco, nada camuda. Ye un ciclu qu’hai que romper fixándose no que la ciencia corrobora no tocante a les especies que torguen l’esporpoye de fueos y nes bones práctiques pa la xestión d’esta Asturies nuestra.
Nun podemos dexar que se siga vaciando’l rural, ya de por sí avieyáu y masculinizáu, produciendo lloñe, ensin derechos, dexando de llau’l territoriu. Nun podemos siguir ensin planificar la economía pensando na Asturies que tenemos y que queremos, nes posibilidaes de nueves economíes venceyaes a la madera, a la biomasa, en consonancia colos ecosistemes y les sos necesidaes, ensin tener en cuenta la multifuncionalidá agraria y ganadera.
Ensin población nin actividá nel rural, esto va siguir pasando. Necesitamos un mediu rural asturianu vivu y dinámicu, que nun tolere los atentaos ambientales.
Por too ello, dende Aína pidimos que se tomen midíes urxentes, non solo na estinción de les quemes que yá se tán dando o na asunción de responsabilidaes penales pa quien les provoca, sinon tamién na prevención a lo llargo de tol añu y, por ello, creyemos qu’estes son les 10 midíes principales qu’hai que tomar.
MIDÍES URXENTES
- Prevención a lo llargo de tol añu y llimpieza de zones de riesgu.
- Más recursos y medios pa dar una rempuesta eficaz.
- Caltenimientu de les plantiyes de trabayadores mientres l’iviernu.
MIDÍES DE FONDU
- Texer aliances a nivel llocal, escuchando a vecines y productores.
- Enfoques centraos na realidá socioeconómica y territorial asturiana.
- Polítiques actives que permitan la producción y la vida nel rural.
- Lleis que torguen l’usu especulativu de les quemes.
- Apueste poles posibilidaes económiques de les roces: biomasa, madera.
- Bones polítiques de recuperación de suelos pa l’actividá agroganadera.
- Paisaxes en mosaicu, planificación d’usos a mediu y llargu plazu.