El partíu súmase a les reivindicaciones por caltener un preciu nestos servicios públicos accesible pa tola comunidá
Dende Aína queremos manifestar al traviés d’esti comunicáu’l nuestru sofitu a les families afectaes nos colexos públicos José Bernando de Sama (Llangréu) y Vega de Guceo de Turón (Mieres) na so llucha por un serviciu de calidá a un preciu xustu nos comedores de les dos escueles.
La Conseyería d’Educación ha dexar de poner escuses y asumir la so responsabilidá. Los y les escolines y les sos families lleven selmanes pidiendo una solución que nun llega. Nun tenemos dulda de que nun ye fácil atopar una solución a llargu plazu que concase cola normativa vixente pero, pel momentu, solo se ta demandando una igua temporal a la subida xabaz del preciu del menú impuesta pola empresa axudicataria.
Sicasí, esta reivindicación de les families amuesa un problema de fondu: el serviciu de comedores nes escueles asturianes -y, en xeneral, en tolos servicios públicos- nun habría cayer en manes d’unes poques empreses privaes esbillaes por una alministración que namás atiende a criterios económicos en cuenta de criterios de calidá pa les usuaries (reciella, persones mayores y enfermes…) y de condiciones pa les trabayadores, davezu muyeres.
Nesti sen, queremos espresar públicamente la necesidá urxente de tresformar y reinventar el sistema d’axudicación de comedores y cocines, yá qu’un serviciu públicu tien qu’aspirar a ser el meyor exemplu posible y referente nun tema tan esencial pa la salú de los escolinos y escolines, pacientes y usuaries como ye’l de l’alimentación.
N’Aína vamos trabayar por algamar no posible esta meta.