Terminó’l ciclu eleutoral n’Asturies
Zarraes les urnes, esti 23 de xunetu de 2023, queda -dientro y fuera d’elles- un panorama asturianu mui complexu. D’una banda, el mieu: a la involución, a la vuelta d’un franquismu sociolóxicu y políticu que nun morriere, al ataque dende les instituciones nes qu’agora añeren esos discursos a tolo que nos fai ser pueblu, a los nuesos derechos sociales, políticos, económicos, a les mínimes llibertaes civiles ganaes a pulsu poles xeneraciones pasaes. D’otra banda, la falta d’ilusión: el contestu “a la defensiva”, nel que nun se planteguen polítiques qu’avancen nel ameyoramientu de les nueses vides, na superación del marcu social, económicu y nacional nel que les asturianes y asturianos vivimos, la idea del “mal menor” o’l votu “pa frenar al fascismu”. Esta sucesión d’eleiciones asturianes y, llueu, estatales, ponen el ramu a un ciclu eleutoral intensu que dexa, d’equí p’alantre, un escenariu difícil nos vinientes cuatro años que, sicasí, ufre oportunidaes dende la óptica que remana Aína.
Una oportunidá nueva pa configurar una alternativa
Al marxe de que se configure, o non, un gobiernu de retrocesu social aceleráu nel contestu estatal y de que les espresiones reformistes conformen un gobiernu n’Asturies que yá anuncia la FSA-PSOE, hai delles coses que pa nós tán clares:
- Tenemos una llexislatura pa poner la ferramienta d’Aína al serviciu de la tresformación social, política, económica y cultural d’un país que se llama Asturies y qu’ha construyise dende la empatía y l’autoestima coleutiva.
- Hemos de llevar a tolos requexos d’Asturies les nueses propuestes, xenerando noyos de participación y alderique dende los conceyos, apurriendo una visión de conxuntu nacional p’arriquecela y afondar na vertebración de la nuesa tierra.
- Vamos facer por desterrar del imaxinariu políticu la murnia, la deceición y la falta d’ilusión pa proyeutar una idea d’Asturies que cuide, que xenere ganes y enfotu na participación, llevando los nuesos análisis a la práutica y dende la cai a les instituciones.
La mirada puesta na idea “Asturies 2027”
Tres les votaciones qu’acaben de terminar hebo quien votó pol partíu menos dañín y quien nun se sintió siquiera interpelao a participar. El retu al que s’enfrenta Aína ye’l d’apellar a toes eses clases populares asturianes, pa que vean en nós una oportunidá pal añu 2027, cuando les nueses instituciones tornen a poner les urnes nes escueles.
¿Mentanto? Un tiempu pa conformar esa alternativa, esplicar los nuesos posicionamientos al nuesu pueblu, llegar a milenta seutores movilizaos y non movilizaos y desendolcar formes nueves de comunicación que superen el mandáu interesáu de los mass-media. Aconceyar, aldericar, proponer dende la sociedá y convencer a tola xente que sigue naguando por una opción ilusionante a la que sofitar, pa que lo faigan con nós.
Pase lo que pase nestos díes vinientes paeznos qu’esta vegada nun ye igual qu’otres.
Agora sí, hai partíu.
¡Siguimos!