Güei, 17 de mayu, ye’l Día Internacional contra la LGTBIfobia. Esto ye’l día internacional contra l’odiu escontra les persones lesbianes, gais, trans, bisexuales, intersexuales, non binaries, y otres orientaciones sexuales o identidaes de xéneru.
N’Asturies nun tenemos nenguna llexislación en materia de derechos LGTBI. Sí disponemos d’un Observatoriu Asturianu escontra la LGTBIfobia, pero que nun cuenta con un presupuestu abondu pa facer el so trabayu en condiciones dignes nin pa dar respuesta a les necesidaes reales de les persones LTGBI nel nuesu territoriu, y con un teléfonu gratuitu p’aquelles persones que precisen sofitu por sufrir dalgún tipu d’agresión. El presupuestu total ye de 10.000 euros al añu, incluyendo l’asesoramientu y sofitu psicolóxicu, y ta atendíu por persones emplegaes y voluntaries de l’asociación XEGA (l’asociación de refencia en derechos LGTBI d’Asturies). Como podemos ver, esti presupuestu nun da nin pa contratar a profesionales que cubran l’asistencia de 24 hores, 365 díes al añu, qu’ufierta’l serviciu, y ponse en manes del voluntarismu.
El colectivu LGTBI sigue sufriendo agresiones y la vulneración de los sos derechos ye una constante, pero nun se denuncien nin la metá de los casos conocíos. En dellos casos son les mesmes fuercies de seguridá les que convencen de nun presentar la denuncia porque, según dicen, nun va sirvir pa nada. Ye por ello que ye urxente formar en diversidá afectivosexual y de xéneru, tanto a estos cuerpos, como a les persones que se dediquen a la sanidá, onde tamién se ven frecuentes discriminaciones escontra esti coleutivu (sobremanera escontra les persones trans), y a la educación.
Un datu interesante, que pue ayudar a visibilizar la problemática a la que nos enfrentamos n’Asturies, ye que la mayoría de los casos d’agresión de los que se tien constancia son escontra homes homosexuales y en redolaes urbanes. Esto débese, principalmente, a que suelen ser muncho más visibles y que, nun gran porcentaxe los casos, los agresores son homes cisheteronormativos blancos y de mediana edá. Tamién ye importante destacar que munchos de los casos danse na redolada: familia o vecinderu, según l’entornu llaboral y educativu.
Ye urxente, poro, la ellaboración de lleis que protexan a les persones LGTBI polo xeneral y a les persones trans en particular, sobremanera teniendo en cuenta la creciente violencia que se da escontra esti coleutivu. Tamién ye importante trabayar la masculinidá tóxica dende la educación a tolos niveles.
Los derechos de les persones LGTBI son innegociables p’Aína, como vinimos amosando a lo llargo de la nuesa trayectoria y asina reflexamos nel nuesu programa, reclamando una llexislación específica pal coleutivu como una prioridá en materia d’igualdá y derechos sociales.
*Los datos recoyíos nesti artículu tán sacaos de la memoria de XEGA de 2021 sobro la LGTBIfobia n’Asturies.