El partíu asturianista denuncia les males condiciones que sufren los vecinos tanto nel hospital como nos centros de salú
Aína sigue aconceyando con distintes organizaciones y asociaciones del Valle Del Nalón. Llueu de vese colos Vecinos de Llangréu pola Sanidá Pública, nel partíu políticu pudieron recoyer dalgunos de los problemes qu’observa la sociedá, amás de les soluciones que podríen sirvir p’afrontar la situación.
En primer llugar, a les llargues llistes d’espera comunes a toles zones sanitaries d’Asturies, nel Nalón hai qu’añader la marcha de dellos profesionales a otros hospitales, tanto de la rede pública como de la privada. Los contratos de poca calidá y mui escasa duración qu’ufierta l’Alministración son de xuru una de les razones d’esti fechu. Esto traduzse en más retrasos y cambios nel personal, lo qu’afeuta de manera mui negativa a los pacientes.
Per otru llau, son habituales les quexes al rodiu de la falta llimpieza de los edificios sanitarios. Nun ye aceptable que llugares onde la salú ye un pegoyu nun cunten con un serviciu de llimpieza de calidá y con personal abondo. Necesítase una meyor xestión, amás d’otru modelu d’organización y coordinación.
P’acabar, la salú mental ye una de les especialidaes con condiciones más llaceriantes. Los pacientes tienen d’esperar meses ente visita y visita al profesional psicolóxicu, cuntando con menos tiempu del necesariu en cada sesión. Amás, el trabayador qu’atiende al paciente pue cambiar en cada consulta, polo que ye imposible que se xenere una verdadera rellación ente profesional y enfermu.
Por too esto, Aína reclama a l’Alministración un aumentu de la inversión, pero tamién de la calidá. El Valle del Nalón tien una población cada vez más avieyao, polo que necesita de más atención médica. Abandonar a los vecinos nun pue ser la solución.