El partíu políticu asturianista tresmite tamién al nuevu alcalde la necesidá d’un mayor aprovechamientu de los espacios públicos.
Aína ta acabante presentar una moción pa que’l plenu de Llangréu-y ponga’l nome de Sara Roces a una de les cais del conceyu. La xugadora de h.oquei llangreana ye una de les meyores deportistes asturianes de la hestoria y amuesa siempre’l so compromisu con Llangréu. Amás, dende la formación asturianista consideren importante dar visibilidá a los deportes minoritarios y a les deportistes femenines, que nun suelen cuntar col reconocimientu merecíu per parte de la sociedá.
Puedes lleer la moción a continuación:
Moción pa solicitar una cai col nome de la deportista Sara Roces
Per otru llau, otra de les propuestes d’Aína, nuna reunión celebrada esti mes de xunetu col alcalde nuevu, foi’l desendolcu d’una política d’aprovechamientu de los espacios públicos. En Llangréu esisten dellos edificios de titularidá pública a los que nun se ta dando nengún usu o se tán infrautilizando. Facilitar qu’asociaciones llocales puedan emplegalos, cola idea d’un hotel común d’asociaciones como opción bien posible, habría ser una de les polítiques a siguir pol Gobiernu del conceyu.
P’acabar, dende Aína amosaron la intención de siguir trabayando y llevar a los plenos del conceyu les sos propuestes, p’ayudar a construyir un Llangréu pa toles persones y nel que pague la pena vivir.
Semeya portada: Telecable Hockey Club