El partíu asturianista reclama a les alministraciones que terminen la obra y que vuelvan les frecuencies ente Llaviana y Xixón
Aína sigue reuniéndose con diferentes asociaciones y coleutivos del Valle del Nalón. Esta vegada la organización política aconceyó cola Plataforma pol Soterramientu de Llangréu, escuchando les quexes de los vecinos y analizando colos sos representantes la situación del tresporte ferroviariu nel Nalón. A partir d’estes conversaciones, Aína quier treslladar dalgunes reivindicaciones a la opinión pública.
En primer llugar, yá ye hora de que les obres terminen. El soterramientu de les víes entamó en 2009, un proyeutu que diba durar namás 36 meses y que diba costar 51 millones d’euros. Depués de 14 años y más del doble de gastos, “paeznos que los vecinos merecen que les alministraciones s’involucren y terminen la obra. Col final de los trabayos, yá llegará’l momentu d’esixir más responsabilidaes polítiques de les que se tomaron hasta agora”.
Amás, “esmolécennos les intenciones del ayuntamientu de Llangréu de construyir edificios nuna zona, conocida popularmente como “zona los contenedores”, onde faen falta otru tipu d’infraestructures alternatives (deportives, culturales, parques…)”. En 2018 los grupos políticos algamaren l’alcuerdu de nun destinar estos terrenos a la construcción de viviendes, pero dende’l gobiernu municipal paecen escaecer la so postura inicial.
Per otru llau, Aína nun pue dexar de reclamar la vuelta de les frecuencies de FEVE ente Llaviana y Xixón nel menor tiempu posible. Nos últimos años, esta llinia perdió más de 800000 viaxeros por mor de les condiciones llacerioses nes que s’alcuentra. “Si nun queremos siguir beneficiando a les grandes empreses como ALSA y dando la espalda a los vecinos que necesiten esti tresporte, les alministraciones tienen el deber de volver a abrir esta llinia y meyorala”, yá que les condiciones enantes del zarru tampoco yeren aceptables.
P’acabar, dende la organización aseguren que van siguir recoyendo les propuestes de los vecinos pa trabayar por un Nalón onde pague la pena vivir.