El partíu asturianista denuncia la infrarrepresentación política d’Asturies respecto d’otres Comunidaes Autónomes y pide qu’el númberu actual d’escaños se caltenga como una cuota mínima independientemente de la perda de población.
Aprovechando la proximidá de les Eleiciones Xenerales del prósimu 23 de xunetu, Aína ta acabante facer un análisis de la representación política asturiana que va surdir d’éstes y nél detéctase una preocupante perda de pesu políticu que va dende’l entamu del actual periodu democráticu, cuando Asturies unviaba 10 representantes al Congresu los Diputaos, hasta los 7 colos que cunta n’actualidá. Amás, recalca que la continua baxada de población pue facer más dramática la situación pudiendo quedar nun futuru prósimu en seis el númberu de congresistes asturianos.
Nesi sen, la formación denuncia la infrarrepresentación política que sufre Asturies por ser una comunidá autónoma uniprovincial en comparanza con otres comunidaes autónomes que, al ser pluriprovinciales, terminen unviando el doble, triple o casi cuádruple númberu de diputaos y diputaes al Congresu, nun teniendo esti repartu d’escaños correlación nenguna col pesu demográficu d’eses comunidaes autónomes pluriprovinciales respecto de la asturiana. Amás, planteguen la hipótesis de que, cola población actual, si Asturies tuviere tres circunscripciones (como asocede nes eleiciones autonómiques) la representación podría tar ente los 10 y 12 congresistes.
Col sistema de repartu actual, denuncien, Asturies sal doblemente castigada yá que, amás de sufrir la crisis demográfica en primera persona con toles consecuencies macro y micro económiques qu’ello conlleva, sufre tamién un castigu perdiendo pesu políticu nes instituciones nes que se deciden, ente otres coses, cómo afrontar esa crisis económica y demográfica o qué inversiones nel territoriu se lleven a cabu.
Consensu políticu
Con too ello, dende Aína entienden que ye menester algamar un consensu políticu nel que los diputaos y les diputaes electos d’Asturies se comprometan a defender nel Congresu los intereses de les asturianes y reclamar un repartu d’escaños xustu qu’evite la infrarrepresentación y que garantice el pesu políticu que-y corresponde a esti territoriu nel marcu estatal. Ye dicir, asegurar qu’Asturies caltenga la so representación actual, nun pudiendo perder nengún representante más y afitando el númberu actual como una cuota de poder territorial mínima independiente de la continua baxada de población.
