El partíu asturianista llama a la participación política dende ámbitos estremaos y va centrase en fortalecese internamente y ampliar el so programa.
La militancia d’Aína respondió a la llamada del partíu. Esti domingu 18 de xunu, nel Centru Social Naranco d’Uviéu, toles persones afiliaes a Aína taben convocaes a decidir cuála había ser la postura del partíu énte les vinientes eleiciones. L’actu cuntaba con un puntu clave nel orde del día: la votación, depués del alderique, sobro la participación d’Aína nesti procesu eleutoral.
El resultáu nun dexa llugar a duldes. Toles persones asistentes, de manera presencial y tamién online, apostaron por qu’Aína diere un pasu a un llau y nun se presentara. Siguir trabayando nes sos propuestes p’Asturies, la responsabilidá y la posibilidá d’influyir nes instituciones dende l’esterior foron dalgunos de los argumentos que se sintieron na Asamblea. Les intervenciones dieron muncha importancia tamién a la necesidá d’asturianizar la política, de crear un discursu y una visión propies que lleguen al conxuntu de la sociedá. Foron munches les persones que, como afiliaes, garraron el micrófonu y espunxeron les sos opiniones.
Amás, la cuestión eleutoral nun foi la única que tuvo presente na Asamblea. Aína aprobó tamién siguir fortaleciendo la organización, apostando por contruyir una propuesta política baxo’l títulu #ASTURIES2027. Otru de los alcuerdos foi’l de llamar a la sociedá asturiana a participar en política más allá de les convocatories eleutorales, implicándose y garrando la pallabra. P’acabar, nel partíu apaez la fecha del 8 setiembre nel horizonte, queriendo organizar al rodiu esti día un actu importante.
A la fin, votación con un resultáu nidiu, aplausos y sorrises. Aína quier siguir xenerando ilusión y llevar a tolos puntos d’Asturies el so programa políticu. Vienen cuatro años de trabayu ensin tiempu pal descansu.