El partíu asturianista convoca a tola so militancia a participar nuna Asamblea Nacional Estraordinaria na que decidir la postura política énte les eleiciones.
Aína, el nuevu partíu políticu asturianista, decidió na so I Asamblea Nacional, celebrada’l pasáu mes de febreru, nun participar nes eleciones a conceyos y a la Xunta Xeneral del 28 de mayu. Esta postura foi aprobada por toles persones presentes naquel actu acutáu a les persones afiliaes.
Agora, tres l’anuncia de la convocatoria eleutoral del 23 de xunetu, Aína vuelve a llamar a la so militancia a garrar la pallabra y decidir. El partíu asturianista va celebrar esti domingu 18 de xunu, a les 17:00 nel Centru Social Naranco d’Uviéu, una Asamblea Nacional Estraordinaria na que van poder participar toles persones afiliaes. Nesta Asamblea, convocada cola urxencia que rique la situación política, tien como oxetivu decidir si Aína tien de participar nesti procesu eleutoral.
P’acabar, esta Asamblea va tener un calter participativu, permitiendo l’asistencia al traviés de medios telemáticos y sintiendo la voz de cualesquier persona afiliada que quiera intervenir. L’eslogan de l’Asamblea, Decidimos xuntes el camín, ye bona amuesa de la visión del partíu. L’oxetivu ye convertir esti actu en dalgo más amplio qu’una votación: nun intercambiu d’idees sobre Asturies y sobre’l proyeutu políticu d’Aína