La economía y la cultura fueron les principales esmoliciones trataes na primer asamblea
Aína nun apara. Tres d’una selmana de trabayu frenéticu, la pasada, con conceyos na Cuenca del
Caudal, la contorna d’Avilés y la Cuenca del Nalón, la nueva organización asturianista y d’izquierdes
abrió esti llunes con un alcuentru n’Uviéu otra selmana d’abonda actividá. La constitución de
l’agrupación llocal d’Aína na capital, na que tamién taben llamaes a sumase les persones inscrites en
Grau, tuvo llugar ayer nel centru social d’Otero, cola presencia de 25 participantes qu’aldericaron
dientro d’un clima constructivu y marcáu poles ganes de trabayar en positivo hacia la construcción
d’un asturianismu modernu y integrador.
Tres calcar na idea de qu’Uviéu ye, más alló de la ciudá, tamién los sos pueblos, l’alderique tocó
al entamu aspeutos relacionaos cola economía y los servicios rurales. La necesidá d’impulsar y
fortalecer la industria primaria dende modelos vidables que garanticen el futuru del seutor y el
respetu al mediu dende enfoques ecoloxistes foi una esmolición compartida con conceyos
celebraos n’otros municipios.
Na hora y media llarga de duración del actu, hebo tiempu amás pa tratar otres cuestiones como’l
tresporte, la turistificación, la vivienda o la cultura. Esti últimu elementu centró ampliamente
l’atención de los y les participantes nel tramu final del conceyu, rescamplando’l so potencial social y
económicu pal algame d’una ciudá y una Asturies más dinámica y comprometida cola so realidá.
Próximos pasos d’Aína
La formación continúa esta tarde con un alcuentru en Noreña la campaña #AbriendoCamín, cola que
ta activando agrupaciones llocales en estremaos conceyos d’Asturies. La cita ye a les 19:15 hores
na Casa Cultura, nun actu abiertu a toles persones de la contorna del Nora interesaes en conocer
esti nuevu proyeutu políticu y participar nél. El xueves será’l turnu de Xixón, que celebra yá’l so
tercer conceyu llocal. Pela so parte, l’agrupación d’Uviéu volverá a aconceyar a mediaos del mes de
febreru pa continuar l’análisis entamáu sobre la situación del municipiu y escomenzar a trabayar en
midíes concretes d’actuación.
Aína constitúise n’Uviéu pa trabayar dende l’asturianismu
por otru modelu de ciudá y de país
