Ente’l 23 y el 31 de xineru, el partíu asturianista nuevu organiza estos actos abiertos nos que tán llamaes a participar más de 75 persones
Dempués de la constitución de les agrupaciones llocales del Nalón, Xixón y Oriente, Aína sigue abriendo camín. El nuevu partíu asturianista y d’izquierdes afronta con intensidá les dos selmanes vinientes, nes que va celebrar alcuentros con tola xente inscrito de les comarques del Caudal, contorna d’Avilés, Uviéu y el Nora, y nos que pueden participar más persones que tengan interés nel procesu que ta desendolcando la formación.
D’esta manera, el llunes 23 de xineru a les 19h na Casa la Cultura de Mieres tán llamaes a participar persones d’Ayer, Mieres, Morcín y Riosa; el miércoles 25 a les 19h nel Centru Sociocultural Los Canapés d’Avilés, xente de d’Avilés, Castrillón, Corvera, Cuideiru, Gozón y Illas; el llunes 30 a les 19h nel Centru Social d’Otero, persones d’Uviéu y Grau; y el martes 31 a les 19.15h les de Llanera, Noreña y Siero na Casa la Cultura de Noreña.
Son más de 75 inscrites -d’un total de 170, pertenecientes a 30 conceyos-, les que tán convocaes a participar nestos cuatro alcuentros nos que va haber tiempu pa desplicar y analizar el procesu desendolcáu hasta la fecha por Aína y, sobre manera, p’aniciar un alderique empobináu a proponer polítiques y formes de trabayu d’interés llocal que dean respuesta a les necesidaes de les parroquies, los barrios y los conceyos.
Cercanía y enfotu
Aína naz col convencimientu de que la cercanía tien de ser un de los pegoyos principales del so facer políticu, que tien ente los sos oxetivos asturianizar la política; señalar y poner igua a les desigualdaes sociales n’Asturies; ufrir una alternativa pa qu’Asturies algame les mayores cotes d’autogobiernu a nivel políticu, económicu y sociocultural, y rexenerar la política asturiana.
Asina, la formación sigue avanzando pa construyir pasín a pasu un asturianismu modernu, apegáu a la realidá asturiana y con un firme compromisu cola xusticia social, con una economía qu’afite futuru n’Asturies, col feminismu, col territoriu, colos servicios públicos, cola democracia participativa, colos derechos humanos, col internacionalismu y cola cultura.