Aína celebra’l so Congresu Fundacional y escueyi a la primer Mesa provisional que va guiar la llegalización del partíu y la formación d’una Asamblea Nacional.
Corvera foi testigu de cómo, a lo llargo la mañana d’esti domingu 6 de payares, Aína celebraba’l so Congresu Fundacional. El Llar acoyó un actu con casi un cientu persones que madrugaron nesti día pa emburriar la fundación d un nuevu partíu políticu p’Asturies.
El Grupu Promotor valoraba de manera positiva, enantes d’entamar, el númberu persones que confirmaren la so presencia nel eventu. Cásique la metá de l’afiliación diba participar, al traviés de la so presencia y la posibilidá d’enmendar los documentos propuestos a la militancia.
El Congresu escomenzaba ente música y cartelos del partíu, colos aplausos, dando pasu a cuatro hores d’actividá en que les persones asistentes aldericaron y aprobaron delles ponencies de referencia sobre la organización (estatutos, organización, ponencia política y estratéxica…)
Nes distintes intervenciones pudieron vese la ilusión y ganes de trabayar de delles persones que, por exemplu, apostaben por “una salida de la crisis pensada dende Asturies” o defendíen “una Asturies na que poder vivir y trabayar con dignidá y mirando al futuru”.
D’ente les inscrites nel Congresu surdió una Mesa Nacional, compuesta por 19 persones, que van tener la responsabilidá de dirixir los primeros díes de vida de la organización y organizar una Asamblea pa la que yá esisten una bayura de documentos d’orientación de los que se mandar.
L’actu, qu’acabó ente abrazos y sorrises per parte del públicu, siguió con una xinta na que, agora de manera más informal, les afiliaes y afiliaos a esti nuevu proyectu pudieron siguir falando sobre’l presente y el futuru d’Aína y d’Asturies.
Ábrese asina, un nuevu ciclu políticu na tradición del asturianismu d’izquierda, con un procesu que va valir pa dar los primeros pasos d’Aína y avanzar nel procesu d’organización.