L’afiliación del partíu asturianista tamién va votar a la so dirección nun actu na Casa la Cultura de Llanera
Aína sigue faciendo camín pa convertise nun partíu asturianista d’izquierda modernu, útil, atractivu y integrador. El Congresu Fundacional celebráu’l 6 de payares -nel que participaron más de 100 persones-, marcó l’arranque d’esta organización. Asina entamó un trabayu de tres meses y mediu nel que se punxeron en marcha les ocho agrupaciones llocales que representen a 30 conceyos de toa Asturies -amás de a les persones emigraes- y se dieron los pasos pa llegalizar el partíu. Esti sábadu 25 de febreru, a les 9.30h, na Casa la Cultura de Llanera (Llugo), Aína va cellebrar la I Asamblea Nacional que supón el nacimientu real de la formación política.
Col títulu #HaiQueTenerEnfotu, nesta asamblea van votase los cargos directivos -Executiva, Mesa Nacional y Comisión de Control y Garantíes Democrátiques-; va aprobase la propuesta d’Estayes de Trabayu estructurales y sectoriales; va presentase’l Plan Feminista #EnsinNosotresNunHaiCamín y tamién la Memoria de la Mesa Nacional Provisional, que va disolvese esi mesmu día al quedar afitaos los nuevos órganos de dirección. Amás, va aldericase y decidir el papel qu’Aína va tener que xugar énte les eleiciones municipales y autonómiques del prósimu mes de mayu.
Col actu de Llanera, nel que namás pue participar quien s’afilie hasta’l 24 de febreru, pónse fin a la primer fase d’Aína na que’l partíu foi consolidando l’afiliación y definiendo les llínies de trabayu políticu gracies a un procesu d’escucha. En total cellebráronse 12 conceyos abiertos a lo llargo del Nalón, Xixón, Oriente, Caudal, Avilés, Uviéu y el Nora. Tamién hubo otru cola xente emigrao, unes persones que son imprescindibles pa esta organización política que nun quier dexar a naide atrás, porque toles manes son necesaries pa trabayar con enfotu y asina valtar col pesimismu y la dexadez que paraliza a la política y a la sociedá asturiana.