Aína sofita la movilización antitaurina d’esti domingu en Xixón. Crueldá, clasismu, subvenciones y imposición cultural.
Una plaza – namás una, en toa Asturies- acueye un eventu de tauromaquia, coincidiendo coles fiestes de Xixón. La denomada “Feria Taurina de Gijón” importa una tradición al país, convertida en norma de la cultura española, na que, al maltratu animal, améstase la subvención pública y un escenariu nel qu’enseñase los poderosos d’Asturies y acuyá pa figurar dende los sos asientos.
L’usu de la tauromaquia como guerra cultural per parte de les dereches nacionalistes nun ye nueva: los festexos con toros son la midida de lo bono pa eses espresiones polítiques; una rellación clasista pa col mundu rural, propia de señoritos, d’élites económiques y la so idea d’estáu. A ello amésten-y un presuntu méritu a la matanza cruel y planificada d’animales, pa que dure lo más posible, y se faiga espectáculu con ella.
N’Aína recoyemos el sentir de Gaspar Melchor de Xovellanos, l’ilustráu asturianu de la villa xixonesa, cuando falaba de la superación intelectual de les toraes pola so crueldá, defendiendo la so prohibición hai dos sieglos.
Xixón, estos díes, conviértese nel escenariu del sadismu pagáu y promocionáu por un conceyu qu’apocayá dio marcha atrás a la lóxica: dexar de permitir la barbarie que nos degrada como sociedá.
El gobiernu asturianu y el conceyu de Xixón han ponese al serviciu del tratu decente a los animales y al mediu nel que viven, non al de les empreses que viven de tolo contrario y faen el xuegu a les espresiones más retrógrades de la sociedá cola connivencia de les instituciones y les sos facilidaes económiques.
Porque somos d’Asturies, porque nun queremos facer negociu col sufrimientu innecesariu, porque somos un país de trabayadores y non de señoritos: vémonos na cai.
Asturies, siempre, antitaurina.
