LLANGRÉU. Aína presentó esta mañana en Llangréu una nueva campaña baxo’l llema Volvéi la industria al pueblu xunto con un manifiestu nel que reflexona alrodiu la situación industrial de les cuenques mineres y propón alternatives concretes pa la so reactivación.
La organización denuncia que la contorna de los conceyos del Nalón y Caudal y foron oxetu d’un procesu de desindustrialización xabaz, lleváu a cabu ensin un plan alternativu realista y como consecuencia de decisiones estrictamente polítiques adoptaes nos ámbitos asturianu, estatal y européu. Arriendes d’ello, anguaño esiste una superficie considerable de suelu industrial ermu d’actividá y ensin ocupación nin proyeutos pa ello.
Frente a esta situación, Aína reclama al Gobiernu asturianu que pase d’una política industrial pasiva y dependiente a otra activa, emprendedora y soberana, onde l’alministración actúe como arquitecta y directora de la reindustrialización, coordine esfuercios cola Universidá y colos centros d’innovación, y llidere la puesta en valor de los polígonos y terrenos industriales abandonaos.
El CIFP CISLAN como activu estratéxicu
El manifiestu identifica al CIFP CISLAN de Llangréu, únicu centru públicu d’Imaxe y Soníu d’Asturies, como un activu estratéxicu de primer orde pa la reactivación de la comarca. Con una formación añal en animación 3D, soníu y producción que llega a centenares de persones, mayoritariamente mocedá, el centru tien el potencial de convertise nel núcleu d’un distritu audiovisual integral.
Aína propón que l’alministración asturiana integre el CISLAN como exe formativu de la estratexa autonómica pal sector audiovisual, allugando nuevos platós ya infraestructures en Llangréu. Amás, plantega venceyar esta iniciativa cola incubadora d’empreses de Valnalón, de forma que los titulaos puedan desarrollar proyectos propios y aniciar productores y estudios con epicentru nel conceyu.
L’oxetivu ye doble: vincular los rodaxes esternos a servicios y técnicos de la contorna, ya impulsar la producción propia asturiana, xenerando emplegu cualificáu y diversificando la economía llocal.
Apuesta pola ciencia y los activos llocales
El manifiestu incide na necesidá de que l’alministración asturiana seya l’inversor principal y ponga en valor les empreses públiques del país, xenerando nueves cuando seya preciso. Propón, amás, que polígonos como’l de Modesta, los terrenos de Nitrastur en Barros, l’antigua factoría de Duro Felguera o los suelos que tien Hunosa dexen de ser oxetu d’especulación y abandonu, y se revitalicen con una planificación estratéxica.
Esti manifiestu nun ye un puntu y final, sinón un puntu de partida, señala la organización, que defende un modelu industrial enraigonáu nel territoriu que retenga’l talentu de la mocedá, fortaleza la economía social y xenere una economía más resiliente cola que construyir una meyor versión d’Asturies.
El manifiestu completu pue consultase y descargar nos canales oficiales d’Aína.