Construyi esti proyecto con nos: https://lanzanos.com/proyectos/llar-aina-asturies/
Aína encara un añu electoral decisivu, y queremos facelo mirando al frente cola fuercia de quien tien vocación de romper el tableru políticu en 2027. Pa consiguilo fai falta daqué tan cenciello como fundamental: un espaciu propiu.
Y tenemos bones noticies: yá atopamos esi llar. La nueva sede d’Aína va tar na cai San Pedro Mestallón, 11, en Uviéu.
Una sede social nun ye namás un local. Ye’l llugar onde recibimos a quien s’acerca per primer vegada, onde producimos les idees que llueu se convierten en propuestes, onde nos formamos y onde nos atopamos quien creyemos qu’Asturies merez un polu políticu propiu, con voz ya identidá asturiana.
Queremos qu’esa casa seya realidá ensin comprometer la capacidá económica del partíu, ensin quitar-y nin un euru a l’actividá política diaria. Poro, recurrimos al crowdfunding: porque esta sede tien de nacer del compromisu coleutivu de quien quier formar parte d’una manera o d’otra d’esti proyeutu.
Poro, facemos un llamáu al activismu, a la ilusión y al enfotu pa ser quien a algamar un mínimu de 6.000 euros pa poder aniciar dignamente la dinámica nel nuevu espaciu, y un óptimu de 10.000 euros que nos dexaría equipar y acondicionar la sede coles garantíes que merez.
La campaña va durar 40 díes. Inauguraremos la nueva sede en setiembre, y va ser nesi mesmu momentu cuando entreguemos les recompenses a quien nos sofitó.
Esta va ser la casa abierta de toa persona que quiera construyir con nós. Un llugar de puertes abiertes, de trabayu compartíu y de futuru. ¡Convidámoste a formar parte de los sos cimientos!