Aína plantega una riestra de midíes nes que sofitar un ameyoramientu na vida de les asturianes y asturianos al traviés de los nuevos presupuestos
Tres aldericase na Xunta Xeneral el proyectu de presupuestos de 2024, dende’l Aína cuestionamos parte del so conteníu y proponemos inversiones sobre seis exes xenerales: infraestructures, trabayu y vivienda, fiscalidá, ciencia y cultura, educación y sanidá, y feminismu. La totalidá de les enmiendes defenden ensin condiciones los servicios públicos y les aiciones enfotaes a que quien quiera pueda vivir n’Asturies.
Nun escaecemos la necesidá de xenerar puestos de trabayu con condiciones dignes y abondes. Los Presupuestos han reflexar inversiones efeutives, nel mesmu sen, que faciliten l’accesu a la vivienda pa la mocedá y les persones en situaciones económiques más difíciles.
Nel ámbitu de la educación y la sanidá públiques, reivindicamos eliminar los conciertos y medrar les dotaciones económiques y humanes pa garantizar la calidá de los servicios en toles especialidaes y etapes, tamién na rede del ERA, l’atención a la dependencia y el curiáu de la infancia. Les cuestiones fiscales, poro, han avanzar col mesmu enfotu, nunca nun dando pasos atrás p’algamar la financiación qu’estos servicios precisen, ye dicir, que paguen más los que más tienen.
No tocante a les propuestes feministes, apostamos por desendolcar polítiques efeutives pela totalidá del territoriu, trabayando p’amenorgar la brecha salarial y aumentando la rede de Centros Asesores de la Muyer, con prioridá de les zones rurales, y de Centros d’Atención Integral a muyeres víctimes de violencies machistes, ente otres aiciones. Destacamos la importancia d’ameyorar estos servicios, equiparando y diversificando el personal cualificao.
N’Aína reclamamos, amás, inversiones reales y efeutives en ciencia y cultura que sofiten l’espoxigue de dambos seutores pa construyir un país meyor. Invitamos al Gobiernu a actuar más alló de los Presupuestos, trabayar pa regular los precios de los alquileres, ameyorar l’Atención Primaria, defender a les trabayadores nos conflictos llaborales y tratar con dignidá les llingües d’Asturies, ente otres aiciones, porque recuerden: los númberos importen, pero nun lo son too.
Responder