Col títulu “Xuntas abrindo un camín”, l’actu va tener llugar nel chigre’l Parque los Pericones y va tar abiertu a tola militancia y simpatizantes
Otru añu más, Aína organiza pa esti 8S un eventu abiertu al públicu xeneral nel que vamos amestar alderique políticu, música y espicha. Va realizase en Xixón, nel chigre del Parque de Los Pericones, alredor del meudía (12:00).
Baxo’l títulu “Xuntas abrindo un camín”, esti añu queremos rendir homenaxe a Conceyu Bable nel cincuentenu aniversariu del so nacimientu, y perespecialmente, a les muyeres que ficieron parte d’aquel movimientu que supunxo l’orixe del asturianismu modernu y que punxo les primeres piedres d’esi camín qu’anguaño nos enfotamos en siguir percorriendo como única alternativa vidable pal futuru del país.
Asina, va abrir l’actu una mesa redonda con muyeres conceyistes. Amás de repasar la trayeutoria del coleutivu, la mesa quier ser un espaciu pa conocer y reconocer les esperiencies particulares de militancia d’estes muyeres y reflexonar sobre los retos que nesti sen tenemos como organización.
A la mesa redonda va siguila una intervención política curtia que va dar pasu a una actuación musical.
La espicha, con un preciu de 15 euros por persona, va entamar a les 14:30 y va poner el ramu a la xornada. Nes próximes selmanes, vamos ofrecevos pali que pali más detalles sobre l’actu.
El chigre y el merenderu atópense nun espaciu privilexáu, arrodiáu de zones verdes y con un parque infantil al llau. Amás, demientres la celebración de la mesa redonda y la intervención política, van programase actividaes y xuegos pa la reciella.
Col envís d’estimar la participación y les necesidaes, pidímosvos que rellenéis el formulariu d’asistencia al que s’accede calcando al final d’esta páxina.
La cumplimentación del formulariu ye fundamental pa les persones que queráis quedar a comer (l’últimu día p’acutar plaza na xinta ye’l 4 setiembre).
Nun momentu nel que tamos avanzando como organización y enseñándonos a la sociedá, hai milenta razones pa dir y nenguna sida pa faltar. ¡Cuntamos cola vuesa presencia!