Aína sentóse na mesa hasta con seis formaciones pa presentar la so propuesta de Candidatura de País. Nun foi posible llegar a nengún entendimientu unitariu y el partíu yá piensa namás que na conformación d’un Polu Asturianu pa les eleiciones asturianes de mayu de 2027.
“Esperáinos. Facéi camín con nós pa superar esta murnia y la orfandá política.”
7 escaños de 350 y nenguna propuesta conformada, debatida, construyida y pensada p’Asturies: esti ye l’escenariu qu’atopa Aína tres de la propuesta de Candidatura de País tresmitida a la sociedá y los partíos el mesmu día en que Pedro Sánchez anunciaba la disolución de les cortes. Intentámoslo: propunximos un marcu políticu de negociación, una idea enriba la mesa que permitía que toes emburriáremos unitariamente una candidatura al marxe de les diferencies estratéxiques, polítiques y organizatives. Asumimos el fracasu d’una propuesta que puxaba por asturianizar, tamién, la política nel Congresu y dexamos de llau la participación de la organización nunos comicios nos qu’Asturies nun xuega con aliendu propiu, nin con posibilidaes de ver nes cortes discursos que traduzan les necesidaes del país en polítiques, alcuerdos y lleis.
Aína intentólo pero nun foi quién a convencer a les organizaciones polítiques de la oportunidá que se presentaba’l viniente 29 de payares pa conformar una candidatura onde les sigles dexaren pasu a persones representatives de la sociedá civil asturiana y llevaren una Axenda Política Asturiana a les cortes. Ensin embargu, tampoco vamos ser parte del problema si gobierna la derecha estrema a partir d’entós: naide va poder dicir que nel nuestru país se pierden votos nel bloque d’izquierdes, nel bloque qu’emburria les polítiques progresistes del estáu español. Compartimos con una parte importante del electoráu d’izquierda d’Asturies la esmolición pola falta d’esperances y de propuestes fresques y vemos nello un peligru evidente. Nin programes, nin estratexa: n’Asturies nun se ta falando más que de quién ostenta’l poder pa negociar: el centru o’l nuestru país, lo que llamen periferia, un xuegu nel que nun podemos apurrir muncho, como organización d’obediencia asturiana.
Pero nun foi un intentu en baldre. Aína intentó llegar hasta toles espresiones de la izquierda organizada n’Asturies y tuvimos mui bones sensaciones con munches persones y espacios colos qu’enxamás nos sentáremos y, tamién, con otros colos que vienen siendo mui cercanos. Por exemplu, siguimos afondando na sintonía col Partíu Verde d’Asturies, que comparte con nós la esmolición pola falta d’un proyectu que lleve a les instituciones asturianes una voz propia y tresformadora. Nesi sen, queremos facer, precisamente, d’esti procesu d’intercambiu de paeceres, l’entamu de la candidatura qu’en mayu ha llevanos a la entrada nes instituciones d’una propuesta asturiana, crítica dende la izquierda política y sindical cola deriva de los gobiernos asturianu, de los conceyos y del gobiernu estatal que salga d’estes eleiciones. Ye’l primer pasu que nos va permitir facer palanca pa xenerar un espaciu políticu asturianu onde los derechos sociales de les y los asturianos nun se discutan.
Nun lo vamos disimular: güei sentimos tristura y, tamién, decepción. Durante estes dos selmanes defendimos daqué cenciello y, al empar, fondamente tresformador: que toles organizaciones de la esquierda asturiana remaren na mesma direición dexando les sigles a un llau y poniendo a Asturies nel centru y a la so xente. Queríemos qu’Asturies unviare a Madrid diputaes y diputaos independientes, ensin más obediencia que la d’una Axenda Asturiana, construyida cola voz de les nueses cuenques, villes, pueblos, ciudaes y los nuestros centros de trabayu. Esa puerta taba abierta y nun se quixo travesar. Ye una oportunidá perdida, y yelo doblemente, porque nel so llugar nun hai idees, nin programes, nin un discursu que-y fale a la xente trabayadora d’esti país. Namás hai nomes, engarradielles por quién encabeza y un repartu de sillones decidíu lloñe d’equí. Fiximos tolo que taba na nuestra mano p’abrir esi camín, con llealtá y ensin pidir nada a cambéu, y d’eso nun nos arrepentimos. Pero tamién sabemos lleer el momentu: cuando’l tableru se simplifica a un repartu de sielles, el nuesu sitiu nun ta nél, y nun vamos ser nós los que resten. Vamos siguir onde tuvimos siempre, trabayando por una Asturies con voz propia, porque esa idea nun morrió güei: namái quedó aplazada.
Güei, col silenciu atronador que sal d’equí y les órdenes que lleguen dende Madrid, muerre la idea d’una Candidatura de País en 2026. Sicasí, el Polu Asturianu que proponemos ta mui vivu y faise más necesariu entá, por motivos evidentes. Dende esti momentu, ponémonos a trabayar únicamente cola mirada puesta nes eleiciones asturianes, pa representar los intereses de les trabayadores d’esta tierra. Facemos un llamáu a la población que mira coles gafes azules y marielles el mundu a tomar la pallabra en cada contestu social, sindical y políticu pa esparder les nuestres idees y p’ayudar a desendolcar una alternativa eleutoral en mayu de 2027. Mentanto, a participar de la manera más acertada tácticamente que se pueda nestes eleiciones.
Esperáinos. Facéi camín con nós pa superar esta murnia y la orfandá política.
Rueda de prensa completa: