Les persones más nueves de la organización compartieron un espaciu informal d’alderique nel qu’espusieron qué futuru deseen pal país
El sábadu 27 de xunetu les militantes y simpatizantes d’Aína esfrutaron de la nuestra I Xuntanza Moza en La Llegra (Uviéu) na que falaron sobro la situación actual d’Asturies y qué modelu de territoriu necesita la mocedá pa que pueda vivir nél con garantíes.
Esti alcuentru informal tuvo llugar a les 18:00 y a participar nél taben llamaes toles persones nacíes dempués del añu 1997 (y que tengan fechos los 16 años) que pertenezan o se sientan identificaes col partíu.
El tema central del eventu foi la puesta en comuña de les distintes perspeutives de futuru pa la mocedá asturiana, qué problemes atopa p’arraigonar la so presencia nel territoriu y qué soluciones existen pa construyir una Asturies na que les oportunidaes dignes pa la xuventú seyan una realidá en cuenta d’un suañu.
Dende Aína creyemos qu’una Asturies llibre, feminista, soberana y xusta ye posible si ente toes facemos camín por ello. Poro, nel futuru van entamase otros conceyos específicos pa les persones más nueves del partíu y con ello caltener una rede de comunicación más direuta ente elles.