Representantes de la Comisión d’Escuelines del partíu caltuvieron un conceyu abondo arriquecedor col sindicatu
Esti llunes, parte de les militantes que trabayaron na Comisión sobre la rede pública d’Escuelines aconceyaron con representantes del sindicatu educativu SUATEA. Nesti alcuentru, intercambiáronse paeceres y idees sobre esti serviciu analizáu nel informe publicáu díes atrás que se pue atopar al final d’esta noticia.
Los principales puntos de converxencia del conceyu fueron el refugu a un sistema de xestión concertada nes Escuelines y el so espardimientu a tola xeografía asturiana ensin esceición. Amás, tamién se señaló la importancia d’algamar les meyores condiciones pa toles trabayadores a lo llargo’l procesu d’estabilización y absorción del serviciu. Dende Aína, al empar que SUATEA, consíderase que los comedores tamién han ser un pegoyu estratéxicu nesti proyeutu. De fechu, insistimos en que l’alministración ha respetar siempre’l so calter públicu y apurri-yos una bona variedá de productos llocales y de calidá.
Pasu ente pasu, vamos dir estrechando los contautos con esta y otres asociaciones pa llograr una rede pública d’Escuelines al altor de les necesidaes del pueblu asturianu.