La xornada va desendolcase’l próximu vienres 24 de mayu a les 18:30 nel palaciu de Valdecarzana d’Avilés
La estaya de Feminismos y Derechos Sociales d’Aína entama un alderique nomáu “Les lluches de les muyeres trabayadores” el vienres 24 de mayu a les 18:30 nel palaciu de Valdecarzana (Avilés). L’actu va consistir nuna mesa redonda conformada por muyeres na que van venceyase dos temes fundamentales nel nuestru ideariu p’algamar un estáu de xusticia social: les condiciones llaborales de les trabayadores de distintos sectores y la situación de la muyer nesos mercaos.
L’alderique va cuntar con cuatro participantes procedentes de sectores llaborales bien estremaos. Les convidaes van compartir les sos esperiencies nesos ámbitos, que van percorrer tanto lo que tradicionalmente se considera’l mundu llaboral como’l trabayu reproductivu y de cuidaos que toles muyeres desendolquen nos sos espacios privaos y personales.
Paula Cristóbal Caso, del proyeutu ecolóxicu y familiar La Güerta Monga va apurrinos delles claves sobro les dificultaes rellatives al emprendimientu agrícola y la falta d’ayudes nel sector dientro del nuestru territoriu.
Otra de les ponentes va ser Abiba Thior, que va ufiertanos una visión perinteresante como xornalera que trabaya pa los grandes terratenientes y que va esponer les condiciones llaborales precaries nes que tienen que vivir les trabayadores del sector primariu.
Afondando nes esperiencies en materia de cuidaos, tanto nel ámbitu domésticu como nos servicios de los establecimientos residenciales d’Asturies pa persones mayores, Merche García Bueno (emplegada doméstica) y Beatriz Fernández Vázquez (trabayadora del ERA) van dar una vuelta respectivamente a les problemátiques nueves nesa estaya y reflexonar sobro aquelles qu’entá siguen vixentes.
Amás, a lo llargo de tol actu, van intercambiase idees pa texer rede en favor de la solidaridá de clas y de xéneru y l’autoorganización. Dende’l partíu, poro, convídase a asistir a toles persones interesaes nestes temátiques esenciales pa construyir una sociedá asturiana moderna, xusta y feminista.