Aína emite un comunicáu nel que señala l’avieyamientu y los consiguientes peligros na vía amás d’una xestión privada ineficaz
El partíu asturianista fai un llamáu a l’asunción de responsabilidaes per parte de la empresa concesionaria, qu’esplota l’usu d’una infra- estructura avieyada y peligrosa y, a la fin, la desapaición de la xestión privada de la vía.
La mañana del domingu 10 de payares Asturies llevantóse cola noticia d’un gran argayu na autopista AP-66, a l’altura del PK 76, de miles de tonelaes de roca y tierra que cubrieron los cuatro carriles de la vía. Ente esta situación, y tolo qu’arrodia a l’autopista de peaxe que comunica’l conceyu de Llena con Lluna y la meseta, Aína quier expresar les siguientes consideraciones:
En primer llugar, esperamos que nun heba nenguna persona mancada nel eventu: nin trabayadores, nin usuaries de la vía nesi momentu. Siguimos les noticies con esmolición. Máxima atención y procuru, tamien, pa que naide se manque, tampoco, nel momentu de les obres de reparación de los desperfectos.
En segundu llugar, cabe señalar que la principal vía de comunicación rodada d’Asturies col sur foi alxudicada a una concesionaria privada que vien beneficiándose económicamente d’ella dende l’añu 1983, hai más de cuatro décades. Que nel añu 2021 acababa la vixencia de la concesión, que’l gobiernu de José María Aznar, con Francisco Alvarez Cascos al mandu de Fomentu, prorrogó hasta 2050 y que’l gobiernu de José Luis Zapatero nun foi quién a rescatar nel so mandatu, anque lo prometiera.
Qu’esta infraestructura presenta bien de deficiencies dende la so construcción: l’apueste polos terraplenes frente a viaductos, el contraperaltáu de munches curves, la mala xestión de los eventos de lluvia o neve, la inestabilidá de lladeres… polo que ye considerada una de les vies d’alta peligrosídá del país. Amás, la so construcción supunxo un altísimu impautu ambiental y social nos valles del centru-sur d’Asturies.
Que ye una de les vies onde’l coste de peaxe por kilómetru ye más altu del estáu, qu’esti beneficiu ta privatizau y que les condiciones de conservación de la vía son, a toes lluces, meyorables, como amuesa esti eventu que nun puede tener llugar si falamos d’una seguridá vial pública decente.
Ente estes considerances, Aina quier demandar lo viniente:
Que la empresa concesionaria asuma les sos responsabilidaes subsidiaries no tocante a esti eventu y la so xestión pa echar a andar de vuelta una infraestructura qu’usen bien de trabayadores d’Asturies acaldía. Y que les instituciones públiques pongan tol procuru nello.
Que, per enésima vegada, l’erariu públicu nun acuda a salvar de les sos responsabilidaes con perres de toes a empreses privaes que se beneficien de la movilidá que precisa la nuestra población y economía.
Que’l gobiernu asturianu faiga un apueste real pola sostenibilidá, caltenibilida y segurida de les vies de comunicación asturianes, apellando a les instituciones académiques públiques referentes nesti ámbitu, que puen ufrir los sos saberes y esperiencia al serviciu del bien común.
Nesti sen, que se revisen y doten de capacidá presupuestaria y loxística a los protocolos necesarios pa torgar que la población se vea espuesto a llaceries como consecuencia d’eventos d’orixe ambiental, nun mundu nel que la sociedá cada vegada espón más bienes económicos y humanos.
Pa finar, que les instituciones apuesten pol tresporte y movilidá pública y vertebradora del país, frente a les grandes infra- estructures pensaes en clave turistificadora. Ye la rede secundaria la que más argayos, inestabilidaes y desperfectos carez y ye, precisamente esta, la que-y da vida a una Asturies rural que se ve amenazada nun modelu económicu nel que la vida fuera de la exa central ta, en munches ocasiones, abandonada dende lo público. Que lo público nun s’escaeza de la so responsabilidá pa con una población que tien el mesmu derechu a una movilidá decente y segura nel so sitiu de vida.
Por una xestión pública que mire, daveres, pola población.