Recta final del procesu de construcción: Aína rexistra 26 candidates y candidatos a ocupar los cargos internos de la organización
La nueva organización d’izquierda soberanista va aprobar, na so I Asamblea Nacional, la primer fornada de cargos internos a la Executiva, la Mesa Nacional y la Comisión de Control y Garantíes Democrátiques.
El viniente 25 de febreru, Aína va celebrar la so I Asamblea Nacional, tres del so Congresu Fundacional de payares de 2022, nel qu’una Mesa Nacional Provisional recibió’l mandáu de les cásique 180 inscrites pa guiar esti procesu de construcción interna. D’entós p’acá, la principal xera del órganu temporal foi la creación d’agrupaciones llocales, la llegalización del partíu y la ellaboración de ponencies pa esta I Asamblea Nacional. D’ella ha salir escoyida una nueva direición del partíu conformada por una Executiva qu’asuma la representación del partíu, una Mesa Nacional qu’apurra trabayu, control y estayes de trabayu y un órganu de garantíes internes.
El sábadu 25 de febreru, entós, va terminase esti primer procesu de construcción qu’algama hasta l’Asamblea Nacional, pa dar pasu a ún nuevu, enfotáu na articulación de discursos, medra d’afiliación y organización de campañes. La xornada va tener llugar nel salón d’actos de la Casa la Cultura asitiada en Llugo, Llanera dende les 9.30h d’esi día hasta les 13h y puen participar toles persones que s’afilien hasta’l día enantes al traviés del formulariu del nuestru sitiu web.
Da’l pasu, ¡que nun quede naide atrás! ¡Hai que tener enfotu! #HaiCamín
Descarga o mira’l documentu coles candidatures provisionales.
Responder