La Mesa Nacional comprométese a crear una comisión electoral d’análisis estratéxicu y económicu tres l’alcuentru cola militancia
Aína convocó’l pasáu domingu 20 d’ochobre a la so afiliación a la Xuntanza #Asturies2027 nel Aula Cultural Onofre Rojo de Sotrondio.
Delles decenes de militantes del partíu reuniéronse, asina, n’asamblea p’aldericar sobre la estratexa #Asturies2027 y definir los oxetivos y formes de trabayu pa los próximos dos años llargos.
La Mesa Nacional del partíu quier agradecer a les asistentes el so interés y les sos aportaciones, imprescindibles pa empobinar una organización que quier caltener una comunicación fluyida en toles direcciones. Amás, tamos especialmente satisfeches cola partipación de cares nueves y de xente mozo.
Asina, Aína fai llegar güei a la so afiliación xunto con estes llinies, les conclusiones que s’algamaron n’aquella xuntanza pa que toles persones conozan qué mandaos tien la organización d’equí p’alantre:
- Convocar una asamblea nacional pa entamos de 2025 col envís d’aprobar un documentu qu’aterrice y defina les coordenaes de la estratexa #Asturies2027.
- Conformar una Comisión de trabayu encargada d’ellaborar el mentáu documentu estratéxicu.
- Conformar una Comisión electoral d’análisis estratéxicu y económicu pal estudiu de víes de financiamientu.
- Repensar el modelu organizativu del partíu
- Mentanto, reactivar les Agrupaciones llocales y involucrales prioritariamente nel trabayu del mentáu documentu estratéxicu. Nel so primer aconceyamientu, les agrupaciones han escoyer una coordinación.
¡Siguimos faciendo camín!