Nel alderique entamáu pola Agrupación Llocal del valle’l Nalón participaron representantes de la Unión de Consumidores, de CCOO y del Sindicatu Ferroviariu
El pasáu vienres 10 de mayu, nes Escueles Dorado de Sama (Llangréu), falóse del tren y de les cercaníes na cuenca del Nalón. L’actu entamáu por Aína cuntó con una asistencia de públicu bultable. Como ponentes tuvieron Dacio Alonso, de la Unión de Consumidores; Andrés Nicieza, del Sindicatu Ferroviariu; y Esther Barbón, secretaria xeneral de Comisiones Obreres nel Nalón. La moderación exercióla Pelayo Martínez Olái, de l’agrupación llocal asturianista.
La mesa redonda, estructurada en tres bloques, empezaba con un análisis de la rede ferroviaria de cercaníes. Esther Barbón definió la situación como “abandonu total” y pa ello punxo d’exemplu los 14 años del soterramientu de Llangréu, con paraes continues nes obres. Tamién comentó que los vecinos de los conceyos del Nalón nun puen disfrutar del serviciu de baldre por ser esti más paecíu al tren del sieglu XIX qu’a lo que tendría que ser en realidá. Pela so parte, Andrés Nicieza criticó que l’Alta Velocidá consumiere tolos recursos económicos mientres nun se facía malpenes un caltenimientu amañosu nin unes inversiones necesaries nes cercaníes, tanto nel personal como nes instalaciones. Amás, recalcó que la frecuencia horaria nun respuende a les necesidaes reales de movilidá de la ciudadanía, convirtiendo la infraestructura en poco útil. Dende la Unión de Consumidores, Dacio Alonso fixo una radiografía a les actuaciones polítiques de les últimes décades pa entender cómo se llega al contestu actual y aprovechó p’alcordar que yera una empresa privada como ALSA quien más beneficiu económicu taba algamando col escenariu actual.
Nel segundu bloque los ponentes tentaron de proponer soluciones a curtiu y mediu plazu. Dalgunes idees foron la necesidá de desdoblar les llinies, afitar horarios más afayadizos, mayor númberu de servicios, aumentar la plantiya y la seguridá, suprimir barreres d’accesu, llevar la vía hasta l’Aeropuertu y, inclusive, aspirar a asumir les competencies de cercaníes de mou progresivu pa que la xestión se faiga n’Asturies.
El tercer bloque amosó consensu en qu’un serviciu de cercaníes de calidá diba ser una gran oportunidá tanto social como económica pa los retos presentes y futuros y tamién en que fai falta una mayor voluntá política y visión estratéxica a llargu plazu.
L’actu finaba con un alderique ente ponentes y públicu onde les diferentes opiniones y argumentos arriquecieron la xornada y espeyaron la necesidá de trabayar de forma conxunta dende tolos sectores pa reclamar una mayor apuesta poles cercaníes.