Tres la cancelación, la intención de la formación ye buscar una data alternativa pa un alcuentru informal cola militancia
Por causes ayenes al partíu, Aína vese na obligación de tener que cancelar l’actu “Xuntas abrindo un Camín” qu’organizaba pa celebrar esti 8 de setiembre.
Va pocos díes, dende’ll llocal onde diba desendolcase l’eventu informáronnos de que, por razones sobreveníes y sobradamente xustificaes, nun diben poder dar acoyida al actu. Ye por ello que, ente la imposibilidá d’atopar nestes feches un espaciu qu’atropare les condiciones afayadices y permitiere caltener íntegru’l programa d’actividaes previstes, tomamos el difícil determín de suspender l’eventu.
Queremos pidir disculpes a les participantes de les estremaes actividaes, asina como a les decenes de persones que ya nós comunicáreis la vuesa intención de celebrar el día con nós y vos apuntareis a la espicha.
Como quiera, dende Aína queremos qu’esto pueda quedar nun aplazamientu y non nuna suspensión del actu. Poro, siguimos trabayando pa poder ufrivos en feches próximes una xornada de xermandía con toles actividaes que yá teníemos preparaes. Porque sía en setiembre, n’ochobre o cuando pinte, de lo que tenemos ganes ye d’alcontranos, de compartir reflexones, esperiencies, lluches, alderiques y mesa, de siguir xuntas abrindo un camín.