Nota de prensa unviada a medios el 15 d’ochobre de 2026, xuntu col Partíu Verde d’Asturies.
Asturies nun pue ser convidada na so propia casa
Queremos que fale con voz propia y unitaria.
El llunes 5 d’ochobre, el mesmu día que s’anunciaron les eleiciones anticipaes, presentóse la propuesta nomada “Candidatura de país p’Asturies”. Diez díes depués y a menos de 48 hores de que se pieslle’l plazu pa rexistrar coaliciones, entá nun hai otra propuesta enriba la mesa. El debate sigue enquistáu en quién encabeza les llistes en Madrid y quién en Barcelona. Mentanto se reparten sielles, naide fala de lo qu’importa realmente y qu’en parte nos lleva a esti escenariu: vivienda, salarios, industria, enerxía, sanidá pública, escuela pública, cuidaos, despoblación, emerxencia climática y el futuru d’una clase trabayadora que lleva décades pagando cada reconversión. Poro, la entruga nun ye quién va de númberu ún. La entruga ye pa qué.
Otros territorios tienen voz propia dende cuantayá nel Congresu y van siguir teniéndola. Asturies non. Y non por casualidá: ye lo que pasa cuando aceptamos ser convidaos ensin voz y esperamos a qu’otros decidan por nós. Esa actitú provinciana tien qu’acabar yá. Asturies precisa urxentemente dar un pasu alantre.
Asturies necesita los sos propios referentes, bien lloñe del ruíu de Madrid. Necesita una candidatura con identidá propia y claramente diferenciada que toles espresiones de la esquierda asturiana puedan sentir suya y emburriar por ella nesti procesu electoral tan particular. Porque nenguna candidatura ye amplia por decretu. Una llista zarrada en despachos ayenos nun ye unidá, ye una franquicia. L’amplitú gánase con respetu y democracia interna.
Por too ello, siguimos alantre cola idea y col enfotu de proponer y intentar algamar una candidatura que desborde les sigles. Con obediencia asturiana, con estructura y identidá propies. Encabezada por figures independientes y representatives de la vida civil, sindical, social y cultural d’Asturies. Que nun entre nel Gobiernu d’España, porque namás dende fuera se pue negociar coles manes llibres: presupuestos, inversiones y tolo qu’afecte a l’Axenda Asturiana que se consensúe a comuña.
Los sos compromisos seríen claros. Nin un votu que permita gobernar a la ultraderecha. Nenguna complicidá cola deriva militarista. Cada votu taría del llau de les demandes populares y la xusticia social, pa revertir los retrocesos y facer frente a los retos de les clases trabayadores asturianes y del restu del Estáu. Porque son munchos los retos, pero dalgunos nun almiten espera: el derechu a la vivienda, un desendolcu xustu de la transición enerxética pa mitigar la emerxencia climática, l’emplegu y los salarios dignos, una industria con futuru, la defensa de los servicios públicos (sanidá, educación y cuidaos), el frenu a la despoblación y, ente l’espoxigue de la estrema derecha, una democracia más fuerte y más fonda que mire pola xente que nella vive.
Nun pidimos un sitiu na mesa d’otros. Proponemos construyir la nuestra. Y hasta l’últimu momentu, les organizaciones firmantes vamos intentar y trabayar con enfotu pa que la candidatura de país que la xente d’Asturies precisa seya una realidá y non una ilusión.
Firmen:
Aína Asturies y Partíu Verde d’Asturies
