El partíu desixe nos coneyos y na Xunta Xeneral que se cumplan los trataos internacionales proponiendo soluciones concretes per vía oficial
A estes altures, l’exércitu israelí asesinó a 45.000 palestines y mancó a 105.000 namás en Gaza. A ello hai que sumar munches miles más desapaecíes debaxo los escombrios y les que muerren por malures y falta de comida y medicines. Yá en xunetu, la revista médica The Lancet asoleyó un estudiu que calculaba que podrían tener muerto 186.000 persones en Gaza por causes indirectes. Amás, casi dos millones sufrieron dellos desplazamientos forzosos y tola población cadez les consecuencies de la destrucción masiva d’infraestructures y del bloquéu de l’ayuda humanitaria que fai falta.
Énte ello, el gobiernu del Estáu español anuncia’l so sofitu a la declaración del Estáu palestín como miembru de plenu derechu de la ONU. El presidente del gobiernu español afita en público que’l mundu tien que parar el xenocidiu del pueblu palestín con un embargu total de la compraventa d’armes con destín a Israel. El Ministeriu d’asuntos exteriores español informa na so plataforma n’internet que dende’l 7 d’ochobre de 2023 nun autorizó operación nenguna de venta d’armes a Israel. Los estatutos de la Universidá d’Uviéu nun permiten la participación n’investigaciones con fines bélicos y el rector Ignacio Villaverde prometió suspender los acuerdos de collaboración con universidades, centros d’investigación o empreses israelíes que nun espresaren un fuerte compromisu cola paz y el cumplimientu del derechu internacional.
¿Qué tien too ello en común pal partíu políticu feminista, soberanista, internacionalista y d’izquierdes Aína? Que son pallabres de baldre, aventaes al aire o escrites sobre un papel, como si’l fechu de diciles o escribiles acabare colos problemes del mundu. Nun ye asina. Abasta lleer l’últimu informe del Centru Delàs d’Estudios pola Paz pa cayer na cuenta de cuála ye la realidá práctica de la participación española nel xenocidiu del pueblu palestín más allá de les pallabres.
Diz la sabiduría popular qu’hai que poner el bolsu onde ta la boca. Pue que nun quede sabiduría na Tierra; o que nun quede sitiu pal pueblu, pa lo popular. Pue ser que los gobiernos y instituciones seyan prisioneres del pensamientu máxicu. O quiciás puea más el bolsu que los principios éticos y faiga falta soltar pallabres guapes qu’atapen la vergoña de ser unes segundones que tienen qu’obedecer al Gran Hermanu americanu y de cuidar namás el negociu. Cantábalo Liza Minnelli, les perres faen xirar el mundu.
Tien que ser eso. Sinón, nun hai quien entienda qu’España siga actuando como puertu de tránsitu de material militar pa Israel, magar la suspensión anunciada pol gobiernu español. Ye más, según DataComex, la Secretaría d’Estáu de Comerciu, España foi, con 1,1 millones d’euros, el quintu estáu de la UE que más armes y municiones esportó a Israel depués del 7 d’ochobre. ¿Y la institución cimera d’educación n’Asturies, qué fai colos sos estatutos y la paz mundial? Lo mesmo, dexar los principios pa prau y siguir venceyada al Proyectu Tiche, que cuenta cola participación d’empreses armamentístiques israelíes.
Esti martes, 17 d’avientu de 2024, la plataforma Xuristes por Palestina xuntóse delantre’l Congresu pa desixir el cumplimientu de los trataos internacionales énte la violación de los derechos humanos y les lleis internacionales en Palestina. Xuntaren la firma de 1.200 xuristes. Quixeron recordar que, según l’artículu 93 de la Constitución, el gobiernu y les Cortes españoles tienen la responsabilidá de garantizar el cumplimientu de los trataos internacionales y les sos resoluciones. Pa ello basáronse na Opinión Consultiva de la Corte Internacional de Xusticia del 19 de xunetu de 2024, nel sofitu de l’Asamblea Xeneral de la ONU a la Corte Internacional de Xusticia del 13 de setiembre de 2024 qu’encamentaba a “los Estaos a cumplir les obligaciones al aldu del derechu internacional” y nel reconocimientu de la Comisión d’Investigación Independiente Internacional que declaró’l 18 d’ochobre de 2024 que “tolos Estaos y organizaciones internacionales tienen la obligación d’actuar col envís de poner fin a la ocupación illegal (d’Israel) inclusive exerciendo presión política, económica y cultural sobre’l gobiernu israelí”.
Por ello, Aína desixe que toles instituciones asturianes y españoles cumplan los trataos internacionales y les sos resoluciones y va presentar énte les mesmes propuestes de resolución nesi sen. Desiximos que s’emitan órdenes d’arrestu contra’l primer ministru Benjamin Netanyahu y l’exministru de defensa Yoav Gallant, que se pongan en marcha sanciones económiques y polítiques contra Israel, que s’aplique dafechu un embargu d’armes y que se ruempan les rellaciones diplomátiques demientres siga’l xenocidiu en Gaza, amás de facilitar les solicitúes d’asilu de palestinos, teniendo en cuenta que yá se devolvió a dalgún palestín que taba nel aeropuertu de Barcelona.
Esta iniciativa, tramitada en rexistru pa que llegue a toles instituciones democrátiques asturianes de conceyos y Xunta Xeneral, ye yá la primer aición d’Aína en 2025.