La formación reclama que s’aprovechen les inversiones anunciaes nos parques llangreanos p’ameyorar la illuminación de los espacios infantiles
Aprovechando l’anuncia del Ayuntamientu al rodiu les prósimes inversiones nel ameyoramientu del parque Dolores Fernández Duro o “parque vieyu”, la formación asturianista propón que s’aproveche la iniciativa pa dotar d’una mayor illuminación la zona de xuegos infantiles. Nesi sen, l’agrupación considera qu’esta midida ye complementaria a les actuaciones previstes y que va permitir optimizar l’usu d’esti espaciu tan importante pa les families, sobre manera nos meses d’iviernu.
Na actualidá, la probe illuminación nel área infantil del parque torga’l disfrute d’esi espaciu a partir de les seis de la tarde, que ye la hora a la qu’escurez. Esti fechu mengua’l tiempu d’espardimientu al aire llibre pa les neñes, los neños y families, privándoles d’un entornu afayadizu y seguru nel periodu coles hores de lluz diaries más escases.
Cola propuesta d’instalación de lluminaries específiques nesta zona búscase, amás d’allargar les hores d’usu, aumentar la seguridá y la funcionalidá del parque. Dende l’Agrupación Llocal d’Aína del valle’l Nalón, tiense l’enfotu de qu’esta suxerencia ha valorase como un ameyoramientu sustancial que complementa la rehabilitación yá prevista del parque y como una rempuesta a una necesidá concreta que tienen les families usuaries d’estos espacios infantiles.