Ayeri, día 21 de mayu de 2023, presentamos el nuesu programa políticu de mínimos ante la militancia y aquelles persones que quixeron venir escuchanos, un programa nel que vamos dir afondando a lo llargo de los próximos años y que denota perbién la nuesa identidá como partíu políticu de la esquierda soberanista asturiana.
L’actu empezó con Claudia González y Sandra Álvarez, una actuación que nos unvia a aquello que somos, a los nuesos raigaños, cola música tradicional del nuesu país como bandera. Sabemos quien somos y quien queremos ser, y nada meyor pa defendelo que la nuesa cultura.
Pa presentar l’actu, les nueses compañeres Nuria García y Pelayo Martínez, recordáronnos aquella primer asamblea na que la militancia decidió nun presentase a les elecciones presentes como un exemplu de responsabilidá política. Pero tamién dexando bien claro qu’estes son les últimes elecciones a les que nun presentamos.
Les distintes árees de trabayu fueron presentaes por Xicu Ariza, Recuperación económica y demográfica, Ástor Llaneza y Rubén Iglesias, Territoriu y Ruralidá, María Fernández y Nacho Berdiales, Xusticia social y servicios públicos, Elena Gutiérrez y Silvia Fernández, Feminismu y derechos sociales, Claudia González y Sergio Rodríguez, Identidá y desarrollu cultural, y Lluis Aique Iglesias y Óliver González, Cercanía democrática y soberaníes.
Dende la puesta de la vida digna nel centru de la nuesa política, pasando pola demanda d’unos servicios públicos de calidá que lleguen a toles cases del nuesu país, la oficialidá de les nueses llingües, la puesta en valor de les nueses tradiciones y de la nuesa cultura, hasta la redacción d’un nuevu estatutu, tolos puntos del nuesu programa políticu van empobinaos a una sola idea: construyir un país soberanu nel que toles persones, independientemente del so llugar d’orixe, puedan vivir dignamente y tar arguyoses de ser asturianes.
Responder