El partíu asturianista reclama a les alministraciones que dupliquen esfuerzos p’atraer proyectos industriales a los polígonos llangreanos
L’agrupación d’Aína de Llangréu amuesa la so preocupación poles continues demores n’apertura de la fábrica de paneles solares que les empreses Exiom y Iberdrola tienen proyectada pal polígonu de Riañu. Nesi sen, comparten l’esmolecimiu de sindicatos y vecinos por un proyectu que, de mano, paecía que diba ser una apuesta interesante y ilusionante pa la reindustrialización de la comarca minera, amás de ser motor pa otros proyectos, revitalizando y renovando la economía d’un conceyu que sigue esperando’l so turnu pa tornar a dar usu al suelu industrial que tantu trabayu y riqueza dio a Asturies durante tol sieglu XX.
La paralización d’una parte importante del suelu industrial que tien el conceyu supón, pa la organización asturianista, un desperdiciu de recursos estratéxicos tanto pa Llangréu y como pa tol valle del Nalón nun momentu críticu y enllenu d’incertidume nel panorama sociopolíticu global.
Poro, dende l’agrupación d’Aína de Llangréu pídese claridá pa cola sociedá llangreana tanto nos plazos d’apertura como nos compromisos de desendolcu económicu y de reindustrialización que s’anuncien y que se tienen pensaos pa les Cuenques Mineres. Esta seriedá ye fundamental pa poder recuperar l’enfotu, autoestima y ilusión nun conceyu que sigue esperando dende cuantayá una solución a la fallida reconversión industrial.
Amás, dende la formación asturianista piden a les Alministraciones, tanto llocal como autonómica, que dupliquen los esfuercios por atopar inversores, idees y proyectos rellacionaos cola ciencia, la tecnoloxía, la innovación y la industria que tornen a dar riqueza y dinamismu a los polígonos y al suelu de Llangréu.