Aporten un añu más el Mes y el Día del Arguyu, nun añu nel que cada vez paez más difícil la llucha por unes condiciones de vida dignes pal coleutivu LGTBIA+ n’Asturies. Les razones pa ellaborar un analís ñegativu tocantes a la nuesa situación n’Asturies nun son precisamente poques, y delles yá les amosáremos cuando tuviemos presentes na convocatoria del Día Escontra la LGTBIfobia: violencies homófobes normalizaes, abandonu o dexadez institucional, falta de recursos necesarios pa les persones trans… Sicasí, nesta ocasión queremos vindicanos como dalgo más que cencielles víctimes. N’Asturies les lesbianes, los gais, la xente trans, les persones bi, aquelles nel espectru arromántico-asexual con moos distintos d’entender l’atracción sexual o romántica, les persones a les que la melecina asigna una dicotomía acientífica y hostil que nun correspuende cola so realidá, y toes aquelles qu’en definitiva la so identidá o mou de vivir la vida nun casa cola cultura tradicional o cisheteronormativa de families biparentales: toes, con too, siguimos siendo comunidá.
Siguimos esistiendo, n’espacios autoxestionaos y n’otros que perviven como pueden colos recursos llocales, nos barrios de les ciudaes asturianes y nes cases de los pueblos, de los conceyos de Narcea y acullá les tierres del Seya, más visibles o teniendo qu’ocultanos nel armariu por protexer los nuesos puestos de trabayu o de les nueses families. Non sólo somos una voz que se vindica a sigo mesma, sinón qu’amás munches decidiemos tar equí formando parte d’Aína, del asturianismu políticu, y consiguiemos construyir un partíu con una fueya de ruta colos colores del arcu la vieya. El compromisu d’Aína col coleutivu ye y debe ser estructural, prioritariu pa integrar un espaciu seguru, y acordies al nuesu mou plural d’entender la soberanía.
Nun podemos defender la soberanía d’Asturies si nel país nun cuntamos con xente como nós que naguamos por ser soberano. Queremos defender les nueses vides y el nuesu mou de vivir. Queremos y necesitamos más espacios, más oportunidaes, más ociu y entretenimientu seguru, más cultura que lleven les nueses lletres nel nome, y lleis y midíes que nos protexan y cedan prioridaes especialmente a les persones en precariedá económica o de salú mental — condiciones qu’asoceden más davezu de lo que se cree, concibe o estudia nes investigaciones oficiales de munchos organismos. Amás, siguimos necesitando amosar y enseñar al restu de la población que toos estos derechos, al aviesu de lo que munchos partíos de dereches y axentes políticos reaicionarios camienten, tienen un raigañu cultural y fondu na sociedá asturiana. Pasín per pasu, quiciabes non tantes como conozamos ainda, pero si güei podemos de falar de Rodrigo Cuevas, Anabel Santiago, Rambal, Tino Casal, de la escena contracultural carbayona de la yá desapaecida Santa Sebe, de La Benéfica, d’espacios y chigres culturales qu’abellugaron y siguen abellugando eventos que contribúin a facer de la cultura asturiana lo diversa que ye güei… Ye gracies a nós.
Asturies ye diversa y paga la pena celebrase diversa. Y por esi motivu, vamos facer que la política tamién lo seya. Vamos asturianizar la política, y siguir faciendo diverso lo asturiano. Vamos facer que lo manflorito seya la nuesa seña d’identidá. Vamos construyir un país pa toes, con entendimientu y compromisu, con optimismu real, y construyíu dende esti potencial y estes ferramientes que tenemos, que son el soberanismu y la xusticia social, y qu’enxamás vamos dexar de llau.
¡LOS NUESTROS DERECHOS, LA NUESTRA SOBERANÍA!