El partíu escoyó a les sos portavoces y coordinadores xenerales amás de la estratexa Asturies 2027
Aína sigue col so camín d’avanzar pasín a pasu na construcción d’una alternativa política asturianista, d’izquierda y feminista. Pesie a producise contactos con otres organizaciones polítiques de dientro y fuera d’Asturies, na III Asamblea Nacional celebrada esti sábadu en Llanera, l’afiliación votó por unanimidá nun presentase a les elecciones europees de xunu de 2024. D’esta manera la militancia del partíu caltién les sos prioridaes: afondar nel programa políticu; nel discursu y les propuestes series; en fortalecer les distintes estayes de trabayu y les agrupaciones llocales; y en texer redes con otros axentes políticos, sociales y culturales. Too ello da forma a “Asturies 2027”, estratexa pa la qu’Aína tamién estrena tres d’esta asamblea portavoces y coordinadores xenerales.
Les dos portavoces del partíu van ser Claudia González (Lluanco, 1999), emigrada esti cursu a Barcelona pa rematar la so formación como música profesional, y Esteban Corteguera (L’Infiestu, 1984) médicu d’urxencies nel hospital de Xove. La coordinación xeneral va recayer en manes de Silvia Fernández (Llugones, 1992), emigrada en Madrid onde trabaya como técnica n’igualdá de xéneru, y Marcos Rodríguez (Uviéu, 1989), profesor na Facultá de Formación de Profesoráu de la Universidá d’Uviéu.
Estes persones representen lo qu’Aína quier reflexar énte la sociedá: xuventú, enerxía, seriedá, asturianismu, feminismu y gana de trabayar pa construyir una Asturies arguyosa de sí mesma y con futuru. Amás, tienen una esperiencia vital y llaboral que conecta cola de munches asturianes y asturianos nacíos yá nel periodu autonómicu: conocen la emigración y la inestabilidá llaboral, la importancia de caltener los servicios públicos, la tresformación del mundu rural y la necesidá de qu’Asturies tenga un proyectu de país.
Y toes en movimientu
Nesta III Asamblea Nacional que llevó por nome “Y toes en movimientu”, tamién s’informó de les cuentes del partíu, presentóse la memoria d’actividá de la Mesa Nacional -l’órganu de Dirección d’Aína-, y aprobóse una reestructuración interna pa facer una organización más eficaz, participativa y ilusionante pa les más de 200 persones -con una media d’edá de 37 años- que yá formen parte d’esti partíu nacíu como respuesta a una sensación d’orfandá política. Asina, Aína va siguir trabayando cola estratexa “Asturies 2027” a lo llargo de los 33 conceyos nos que tien afiliación.