Nesti testu amosamos el nuestru sofitu a un enseñu públicu equitativu y xustu y afalamos a participar na manifestación educativa del 27 d’abril
¿Y esto pa qué val, profe? Tornamos a salir a les cais pa defender la escuela pública asturiana. Nun nos queda otra que poner el pie na paré pa frenar el so deterioru y desmantelamientu que ye, cada vegada, más claru énte los nuestros güeyos. Y l’interés social y pedagóxicu qu’habría tar tres d’ella, cada vegada más tapecíu.
Anguaño, la escuela pública vive un momentu de perda de recursos materiales y personales, de burocratización deshumanizadora -cásique de xudicialización-, de pieslle d’unidaes en favor de la privada y los sos conciertos educativos y de precarización del trabayu de les persones que rispen y tiren por ella. La calidá de la enseñanza mídese “al pesu”: si hai una bona montonera de papel ye qu’hai calidá, cuando la realidá ye bien distinta.
El profesoráu de la escuela pública nun espurre pa más. Nun hai tiempu de coordinaciones, nin pa creación de materiales, nin pa formase. L’alministración escaez que lo que fai’l profesoráu ye muncho más que la docencia direuta que, tamién, enllena de papeleos que tapecen la intencionalidá pedagóxica de les nueves propuestes educatives que queden somorguiaes embaxo d’informes, programaciones y actes enllenes d’intenciones pero escases d’inversiones onde la tasa d’interinidá masiva y les medies xornaes siguen siendo norma y non esceición.
L’alministración ta abierta a toles esperiencies innovadores del mundu…
…menos a la más evidente: baxar la ratio d’alumnáu, contratar más profesoráu, ameyorar l’atención personal y atender les necesidaes específiques d’apoyu al traviés d’especialistes de PT y AL. Amás, cada añu aumenta la matrícula nos centros d’educación especial que, según dicíen, diben quedar como centros de recursos y formación al profesoráu n’atención a la diversidá.
El Diseñu Universal d’Aprendizaxe ye la meta a la que toles docentes hemos de llegar. Eso sí: tenemos que subir al monte ensin agua, calzáu afayadizu, sofitu y ensin mapa col track del camín. La Conseyería quier que lleguemos a lo cimero non sólo ensin ayuda, sinón qu’amás enllena les maletes de papeles colos que nun somos quien a avanzar. Amás, la degradación del enseñu públicu y la privatización de l’atención a la diversidá emburria a que munches families tengan qu’acudir a consultes privaes pa recibir diagnósticu pedagóxicu, intervención educativa o reeducación de la fala pola incapacidá de lo público p’atender estes necesidaes colos pocos recursos personales colos que cuntamos.
La reciella afronta contestos nuevos énte l’aprendizaxe nun mundu, dacuando, más espuestu a nueves adicciones. Precisamos de personal especializáu nestes temátiques, pa qu’oriente a la xente más mozo y-yos permita afrontar con más ferramientes d’autocontrol y oportunidaes reales un mundu davezu hostil haza l’aprendizaxe, qu’en munches ocasiones afronta en soledá.
Con esti panorama, la Conseyería d’Educación en cuenta de baxar ratios, incorporar más personal y recursos d’atención a la diversidá con aules abiertes p programes específicos p’atender al alumnáu con dificultaes de conducta y/o fracasu escolar namás ufre un sistema d’etiquetes que nun doten de recursos y que discriminen al alumnáu pa tola vida.
Amás de too esto, l’asturianización del currículu educativu ye una delda pendiente: la escuela pública nuestra vive dando’l llombu a la realidá asturiana qu’en munchos casos namás algama la óptica propia gracies a la voluntá d’un cuerpu docente comprometíu col país cultural, científica y llingüísticamente.
No tocante a los idiomes, la situación ye más que llaceriosa: la falta d’especialidá propia torga la estabilización del profesoráu en secundaria y déxalo na mayor de les indefensiones. La precariedá del profesoráu yelo tamién pa una materia que sigue compitiendo con otres y que nun ye como les demás: l’alministración sigue considerando al asturianu y al gallego-asturiano como llingües de segunda, faciéndoles de menos énte la reciella y, tamién, la sociedá. Pero ye que l’usu tresversal de los nuestros idiomes como llingües vehiculares n’otres materies sigue ensin llegar por más que se nos falara de programes pilotu ensin implantación real.
Nesti escenariu, nun pue ser que sigamos dando perres públiques de toes y toos a centros concertaos y pesllando unidaes na escuela pública. Tenemos que finar colos conciertos educativos -a les empreses católiques mayoritariamente- que nun son siquiera necesarios nos términos argumentativos d’un gobiernu que los caltién y que nos tán llevando a la ruina. Tenemos que garantizar una rede d’escueles 0-3 totalmente pública y gratuita llegando a les zones rurales, garantizando’l tresporte de la reciella y unos comedores escolares de calidá, tamién de xestión pública y de precios razonables. Hemos facer realidá’l suañu de la inclusión pero con recursos reales personales, formativos y materiales, sofitando y cuidando a la mocedá asturiana que nun solo ye’l nuestru futuru, sinón que, muncho más importante, ye’l nuestru PRESENTE.
¿Qué pa qué val lluchar, ho? Pa defender lo que ye nuestro.
Por una escuela pública de calidá: xúnite a la manifestación d’esti sábadu 27 d’abril a les 12.30 na estación de RENFE d’Uviéu.
¡Xuntes siguimos faciendo camín!