Al traviés de les nuestres redes y los espacios físicos queremos tresmitir a la sociedá asturiana la nuestra conderga al modelu turísticu actual
El turismu masificao tien un impactu evidente y perxudicial na nuesa tierra. Mentes el sector turísticu xenera riqueza pa unos pocos, somos munches persones les que sufrimos les consecuencies. El preciu la vivienda sube de manera insostenible, dificultando l’accesu a un derechu básicu pa la xente trabayadora y la mocedá que quier quedar n’Asturies. Colos alquileres descontrolaos, son munches les persones que nun pueden permitise siguir viviendo nos sos propios llugares.
Amás, l’encarecimientu la vida, tanto en productos básicos como en servicios, fai que vivir n’Asturies sía cada vegada más difícil. Los servicios públicos, como la sanidá o’l tresporte, vense degradaos pola saturación estacional, ensin los refuerzos necesarios pa garantizar una calidá digna pa tola población. A too ello hai qu’amestar fenómenos como la contaminación y l’espoliu ambiental, que xenera una masificación turística que destroza l’entornu natural.
L’ausencia de tases turístiques pa paliar estos impactos, un gastu constante en promoción turística y la falta de polítiques efectives pal decrecimientu tán llevando a Asturies a un modelu insostenible, tanto pa les que vivimos equí como pa la nuesa tierra.
El decrecimientu del turismu masificao ye la solución pa caltener una Asturies más xusta y equitativa, onde la sostenibilidá sía la base pa un futuru dignu pa toos y toes. Defendemos una Asturies pa la xente que vive equí, onde’l desendolcu social y económicu nun vaya en perxuiciu de la vida de les persones nin del nuesu mediu ambiente.
La turistificación, esto ye, l’apueste pol monocultivu del sector servicios ye un enfoque económicu que nos dexa un país onde les condiciones llaborales, ambientales y sociales van, acaldía, a menos. N’Aína tenémoslo claro: ¿una Asturies pal turismu o pa quien vivimos nella?
#UnaAsturiesPaVivirNella