Trabayu pa toes
N’Asturies, un 20,1% la población ta en riesgu de probitú y un 4,4% carez una situación de probitú estrema. Nel Estáu español, les venti persones más riques acumulen tanta riqueza material como’l 30% la población más desfavorecío.
Nenguna sociedá pue aspirar a ser verdaderamente soberana y democrática si esisten estes diferencies descomanaes ente les persones que la formen. Pero nesti mundu globalizáu favorezse la especulación perriba la producción, les multinacionales deciden una bona parte de les nuestres circunstancies vitales y rebaxen a les trabayadores hasta convertiles namás en pieces del engranaxe capitalista.
Ye fundamental que les trabayadores pasen a tener un papel activu nes sos vides pa tener trabayos con unes condiciones dignes, qu’aseguren cubrir les necesidaes vitales, la conciliación y l’espardimientu. Esti ye un primer pasu p’algamar que les persones y les sociedaes se faigan activamente responsables camín d’un repartu más xustu de la riqueza y d’una mayor participación na toma de decisiones vitales y polítiques.
Servicios Públicos
Unos servicios públicos y de calidá son la clave pa consiguir un país onde la xusticia social seya una realidá.
Cubrir de manera eficaz les necesidaes de les usuaries y unes condiciones dignes pa les trabayadores solo pue algamase con una fiscalidá al serviciu de lo público.
La sociedá asturiana tien la responsabilidá de protexer el so sistema públicu de los ataques de los intereses privaos, aspirando amás a qu’espurra a tolos sectores estratéxicos pa caltener vides que pague la pena vivir.
Cuidaos y Derechos Sociales
El mercáu llaboral ye davezu un llugar agresivu pa les persones migrantes, les pertenecientes al colectivu LGTB+ y les muyeres. Cualquier excusa ye bona pa precarizar más entá la situación de les trabayadores porque l’únicu oxetivu pa munchos ye algamar los máximos beneficios posibles.
Reclamamos lleis que protexan a les emplegaes y emplegaos en xeneral y a estos grupos en particular, faciendo posible poner los cuidaos y la vida nel centru.
Amás, queremos organizaciones sindicales verdaderamente horizontales onde toles trabayadores puedan aportar a la llucha a comuña polos derechos de toes ensin sufrir ningún tipu de violencia o discriminación.
Demografía
La crisis demográfica n’Asturies nun ye dalgo nuevo, llevamos décades sufriendo una perda de población mozo y un abandonu del rural que la clas política asturiana nun sabe cómo o nun quier enfrentar.
Un partíu ñacíu n’Asturies y con vocación d’asturianizar la política ta obligáu a facer un análisis colos pies puestos, de manera lliteral, na tierra.
Una formación que permita a la mocedá entender el mundu dende un conocimientu de lo que ye’l so propiu país y un estudiu posáu y intelixente de los sectores productivos estratéxicos n’Asturies son el primer pasu pa que toes podamos trabayar y vivir dignamente n’Asturies.
Producción Caltenible
Los y les trabayadores del campu fueron hestóricamente les grandes escaecíes nes movilizaciones del primeru de mayu n’Asturies. La situación de la ganadería y l’agricultura ye crítica, con munches explotaciones y families al borde la quiebra, con una renta agraria que nun para de menguar, saliendo alantre a costa de la precarización de les condiciones llaborales.
Nesta fonda crisis ye necesaria la solidaridá de tola clas obrera asturiana, p’algamar un gran cambiu na dinámica del rural asturianu.
L’ actividá económica productiva ye vertebradora d’un territoriu rural vivu, polo que son necesaries polítiques como’l cumplimientu de la llei de la cadena alimentaria, facilitar el relevu xeneracional (incluyendo nesti sen l’ accesu a la tierra ), asina como apostar pola producción, tresformación y venta dende lo rural, con una diversificación de les actividaes productives que mos acerque amás a la soberanía alimentaria, sostenible y xusta.
Tamién reclamamos una apuesta decidida de l’alministración pola modernización de la rede de caminos, pistes y accesos a les finques al traviés d’inversiones nes infraestructures viales, permitiendo asina faceles muncho más segures y más eficaces pa la maquinaria moderno. La seguridá nel trabayu tien que tar tamién presente nel rural.
Cultura
El sector de la cultura, históricamente precarizáu, precisa de polítiques públiques que potencien el desendolcu del potencial económicu que tien esta industria y qu’aseguren el camín a la profesionalización pa les trabayadores.
D’esta miente, han d’afitase estructures llaborales xustes, dotaes de la estabilidá y de la dignidá dafechu necesaries pa poner la identidá y la cultura asturianes al serviciu la xente.