Más d’un cientu de persones pónense en contactu col partíu asturianista pa demandar una vivienda digna tres una campaña imaxinativa na que se simulaba l’alquiler de vivienda dende
300€/mes o la venta d’inmuebles por 60.000€ per parte d’una promotora de participación pública.
L’agrupación local d’Aína Asturies n’Uviéu llevó a cabu nos últimos díes una campaña pola vivienda que buscó llamar l’atención de la población sobre la situación insostenible del accesu a una vivienda digna nel país, y la necesidá urxente d’un cambéu de modelu.
La iniciativa principió col repartu pola cai de panfletos que simulaben ser anuncios reales d’oferta de pisos p’alquilar y pa vender n’Uviéu. Al dar la vuelta al panfletu, atopábase un testu onde s’esplicaben les principales reivindicaciones d’Aína Asturies en materia de vivienda, poniendo de manifiestu la distancia ente lo que debería ser un derechu garantizáu y la realidá actual del mercáu inmobiliariu.
Amás del repartu de panfletos, el partíu colocó dos valles publicitaries en La Tenderina y La Corredoria, pa reforzar l’efectu de la campaña, buscando un impactu mayor ente la ciudadanía uvieína. Estes valles xeneraron tamién un interés grande y un bon númeru de consultes al teléfonu del partíu. Amás, los materiales presentaben un QR que redirixe a la web del partíu, que recibió miles de visites na última selmana.
L’oxetivu de la campaña yera provocar reflexión y debate social sobre un problema que afecta a miles de persones. El día del repartu fueron munches les que se pararon a falar coles militantes d’Aína Asturies, amosando interés y compartiendo la so preocupación pola situación de la vivienda. Amás, nos díes posteriores, más d’un cientu de persones contactaron col teléfonu d’Aína, que yera’l que figuraba nes octavilles, interesándose por esa oferta,
un fechu que pon de relieve l’ésitu y l’impactu d’esta campaña imaxinativa.
La campaña completóse una selmana dempués con una charra-debate celebrada na Casona La Montaña d’Uviéu, na que participaron compañeros del Sindicatu d’Inquilines y del Movimientu pola Vivienda d’Euskadi. L’actu favoreció l’intercambiu d’esperiencies y l’análisis de propuestes pa garantizar el derechu a la vivienda dende una perspectiva social y transformadora.
Dende Aína Asturies reiteren que la vivienda ye un derechu fundamental y que, polo tanto, nun puede siguir siendo un mediu p’arriquecese unos pocos a costa de la precariedá de la mayoría. La organización defiende la necesidá d’aplicar polítiques públiques integrales que vayan más allá de la simple construcción de vivienda nueva o de fomentar l’alquiler de pisos vacíos, pa que la vivienda seya tratada como lo que defendemos que ye: un derechu básicu que les instituciones tienen la obligación de garantizar.
Asina, Aína Asturies apuesta pola creación d’un serviciu públicu de vivienda que cuente con un parque públicu d’alquiler estable y asequible y que desenvuelva midíes de calter social como la protección efectiva de les inquilines frente a desahucios, una moratoria permanente cuando nun esista alternativa habitacional, acompañamientu social y mediación pública ante procesos xudiciales, la obligatoriedá del alquiler social pa grandes tenedores y entidaes financieres en casos d’impagu por vulnerabilidá, asina como la puesta en marcha d’un observatoriu públicu de vivienda y una bolsa pública d’alquiler.
Nesti sen, les propuestes de regulación impulsaes polos gobiernos estatal y asturianu anecia nos mesmos problemes: siguir permitiendo’l funcionamientu del rentismu, nun considerar el derechu efectivu a la vivienda, favorecer la especulación urbanística y afondar na turistificación del nuestru país.