La formación asturianista espón les sos reivindicaciones pal barriu coindiciendo cola celebración de les fiestes de Santiago
L’Agrupación Llocal de Xixón del partíu asturianista Aína lleva dellos meses aconceyando con axentes sociales de la ciudá pa conocer de primer mano los sos esmolecimientos y reivindicaciones. Coincidiendo agora col entamu de les fiestes de Santiago del popular barriu de Ciares, Aína plantega delles propuestes pa meyorar la vida del vecindariu del barriu.
Dende Aína, coinciden colos planteamientos de l’AAVV Esto ye Ciares y defenden el desarrollu del plan d’usos del Hogar de Ciares, a la par que la so rehabilitación pola importancia que supón el so calter vetebrador p’habitantes, colectivos y asociaciones deportives. Amás, la formación soberanista cree que nesti espaciu habría d’habilitase un chigre-tienda de titularidá municipal pa da-y respuesta a les carencies que’l vecindariu de La Teyerona tien nesti sen.
Per otru llau, Aína critica qu’esti barriu popular ta arrodiau de colexos concertaos. Por eso defende que toles alministraciones s’impliquen pa que’l Colexu Públicu Los Pericones puea competir n’igualdá de condiciones colos colexos concertaos del mesmu barriu, ufriendo les mesmes opciones d’acompañamientu y conciliación.
Participación popular
Amás de too esto, el partíu asturianista critica la infrautilización del parque de Los Pericones; un enorme espaciu verde nel corazón del barriu que nun tien nenguna dotación deportiva y con un equipamientu infantil avieyáu, polo qu’apuesta pol so ameyoramientu y actualización.
En definitiva, lo qu’Aína plantega pa Ciares ye que s’atienda a les reivindicaciones vecinales y que los planes d’ameyoramientu o renovación s’abran a la participación popular de los sos habitantes y trabayadores.
Responder