El nuevu partíu asturianista d’izquierda va centrar los esfuercios en facer política y país con posu, seriedá, respetu y constancia
“Vamos despacio porque vamos lloñe”, esi ye’l resume del sentir del partíu asturianista Aína, que sal de la so primer Asamblea Nacional, celebrada’l sábadu 25 Llugo de Llanera, con un posicionamientu unánime de cara a les eleiciones de mayu de 2023; el de nun presentase. Sicasí, la formación sí que va preparar un programa políticu col que trabayar nos próximos cuatro años, porque lo que más rescampló nel actu foi la ilusión, l’enfotu, la unidá, el respetu y les ganes de trabayar con constacia pa ser útiles a la sociedá asturiana.
A les 10 de la mañana arrancaba puntual la I Asamblea Nacional a la que taba convocáu’l cuasi centenar d’afiliaos y afiliaes (de les 190 persones totales inscrites). La xornada entamó presentando’l Plan Feminista nomáu #EnsinNosotresNunHaiCamín col que la organización quier trabayar de forma seria y contundente p’avanzar hacia un horizonte nel que la participación de les muyeres na organización alcance cuotes d’igualdá plena y qu’Aína seya un partíu feminista transinclusivu, respetuosu cola diversidá funcional, étnica, l’adscripción de xéneru y la orientación sexual
Esti plan dio pasu a la llectura y aprobación de la Memoria del llabor fecho estos trés meses previos pola Mesa Provisional y, darréu, fíxose una propuesta formal de les Estayes de Trabayu coles que’l partíu quier afalar la participación de l’afiliación n’estremaos temes y afondar nel so programa políticu. Asinamesmo, aprobáronse les candidatures de consensu pa los órganos directivos del partíu; eso ye, una Executiva paritaria formada por trece persones, una Mesa Nacional conformada por ventiún afiliaes y afiliaos y, amás, una Comisión de Garantíes Democrátiques qu’integren cinco persones. Esta ye la dirección que va guiar a esta nueva formación que tien presencia en 33 conceyos de toa Asturies y con una militancia xoven, con una media d’edá de 37 años.
Elecciones
Finalmente, l’alderique eleutoral espeyó un ambiente de másimu respetu y empatía haza les diferentes opiniones y fíxose un análisis fonderu de les Debilidaes, Amenaces, Fortaleces y Oportunidaes de caún de los trés escenarios posibles: presentase en solitariu a les eleiciones, nun se presentar o esplorar otres víes de presentase. Ente los estremaos enfoques, la decisión final algamó una amplísimu consensu y les persones afiliaes decidieron qu’estes van ser les últimes eleiciones municipales y autonómiques a les qu’Aína nun se va presentar, pa centrase asina en siguir un faciendo camín posáu pero firme; trabayar nel programa políticu que quier presentar a la sociedá; siguir faciendo política dende la cercanía; xenerar discursos; ilusionar a la xente y trabayar na direición d’algamar la meyor versión posible d’Asturies con propuestes series y bien trabayaes.
La xornada terminó con una sensación d’ánimu, enfotu y ilusión por siguir trabayando en crear un asturianismu d’izquierda seriu, modernu, integrador y pragmáticu, pa lo que la Executiva y la Mesa Nacional d’Aína principiaron por encamentar a l’afiliación y les inscrites a participar na movilización pola Sanidá Público qu’hai el domingu n’Uviéu.